سعودی وزیر اطلاعات و نشریات ماجد القصبی نے کہا ہے کہ سعودی عرب میں سیاحت کے شعبے میں تیزی سے تبدیلی آئی ہے۔ سعودی وژن 2030ء سے سیاحتی شعبے میں 470 فیصد سے زائد اضافہ ہوچکا ہے۔

الاقتصادیہ کے مطابق ماجد القصبی نے کہا کہ 2021ء کے آخر میں ولی عہد محمد بن سلمان کے دورہء خلیج نے تعاون کے فروغ کے حوالے سے بہترین نتائج دیے ہیں جس کا ثبوت خلیجی سربراہ کانفرنس کی قراردادیں ہیں۔

ماجد القصبی نے بتایا کہ سعودی حکومت نے گزشتہ ماہ معدنیات کی بین الاقوامی کانفرنس کی میزبانی کی جس میں 32 ممالک کے سو سے زیادہ وزراء اور ماہر شریک ہوئے جبکہ کانکنی کے شعبے کی کمرشل رجسٹریشن کی تعداد میں 1300 فیصد اضافہ ریکارڈ کیا گیا ہے۔

قائم مقام وزیر اطلاعات نے کہا کہ ولی عہد شہزادہ محمد بن سلمان نے جدہ سٹی سینٹر پراجیکٹ کا اعلان کیا ہے جس کا پہلا مرحلہ 2027ء میں مکمل ہوگا۔ اس سے جدہ بین الاقوامی سیاحتی شہر بن جائے گا۔

ماجد القصبی نے کہا کہ سیاحت کو فروغ دینے کے لیے بوٹیک گروپ بھی شروع کیا جا رہا ہے۔ مملکت میں موجود تاریخی محلوں کو بین الاقوامی ہوٹلز میں تبدیل کررہے ہیں۔ سعودی وژن 2030ء شہروں کی نئی شناخت پر توجہ مرکوز کیے ہوئے ہے۔

قائم مقام سعودی وزیر اطلاعات نے کہا کہ سیاحت کے شعبے میں تیزی سے تبدیلیاں ہورہی ہیں۔ سعودی وژن 2030 سے قبل سیاحتی شعبے میں کمرشل رجسٹریشن کی تعداد ایک ہزار تھی 2021ء میں 470 فیصد اضافے سے بڑھ کر 5800 ہوگئی ہے۔

سبق ویب سائٹ کے مطابق ماجد القصبی نے کہا کہ سیاحتی اداروں کی تعداد پانچ گنا بڑھ چکی ہے۔ دس ہزار سے زیادہ فیکٹریاں ہیں۔ کورونا وبا کے باوجود گزشتہ سال 188 ممالک کو 208 ارب ریال کا سامان برآمد کیا گیا ہے۔

قائم مقام سعودی وزیر اطلاعات نے بتایا کہ تفریحی فیسٹیول ریاض سیزن 2 کے پروگرام دیکھنے والوں کی تعداد 11 ملین سے زیادہ ہوچکی ہے۔