یورپی کمیشن کی سربراہ کا کہنا ہے کہ جنگ عظیم دوم کے بعد یورپ میں دوبارہ جنگ کے ذمہ دار روسی صدر ولادیمیر پیوٹن ہیں۔

غیر ملکی خبر رساں ایجنسی کے مطابق یورپی کمیشن کی سربراہ ارسلا وان در لیئن نے روسی صدر پیٹن کی یوکرین پر حملے کی مذمت کرتے ہوئے کہنا تھا کہ وہ یورپ میں دوبارہ جنگ کے ذمہ دار ہیں۔

یہ بھی پڑھیں: روس کا یوکرین پر حملہ؛ اپ ڈیٹس، یوکرین کا روسی طیارے اور ہیلی کاپٹر تباہ کرنے کا دعویٰ

انہوں نے کہا کہ بڑے پیمانے پر روس پر معاشی پابندیاں تجویز کی جائیں تاکہ روس کی معیشت کو کمزرو کیا جاسکے۔

واضح رہے کہ روسی صدر ولادیمیر پیوٹن نے یوکرین کے علاقے ڈونباس میں فوجی آپریشن شروع کرنے کا اعلان کیا تھا جس کے چند منٹ بعد ہی روس کی جانب سے یوکرین پر پہلی گولہ باری اورمیزائل حملے داغے دیے گئے تھے۔

بعد ازاں یوکرائن کا دعویٰ سامنے آیا ہے کہ روسی فوج شمالی اور مشرقی یوکرین میں داخل ہوگئی ہے۔

اب تک کی اطلاعات اوریوکرینی پولیس کے مطابق فوجی یونٹ پر ہونے والے حملوں میں کم از کم 7 افراد ہلاک اور 7 زخمی ہوگئے ہیں جبکہ 19 افرادلاپتہ بھی ہیں۔

دوسری جانب یوکرین کے دارالحکومت کیف میں لوگوں کا انخلا شروع ہوگیا ہے اورایکسپریس وے پر گاڑیوں کی لمبی قطاریں دیکھنے کو ملی ہیں۔

اس موقع پر یوکرین کے صدر ولادیمیر زیلینسکی نے ملک میں مارشل لا نافذ کرنے کا بھی اعلان کردیا ہے۔