امریکی صدر جوبائیڈن کا کہنا ہے کہ یوکرین پر روس کے حملے کا امکان اب بھی بہت زیادہ ہے جس کی انسانی قیمت بہت زیادہ ہوگی۔

امریکی صدرجوبائیڈن نے ٹیلی ویژن خطاب کرتے ہوئے کہا کہ اگر روس نے یوکرین پر حملہ کیا تو پابندیاں تیار ہیں اور امریکہ اس طرح کے اقدام کا فیصلہ کن جواب دینے کے لیے بھی تیار ہے۔

امریکی صدر نے کہا کہ امریکا کو اب تک روسی فوجی واپس بلائے جانے کی تصدیق نہیں ہوسکی ہے، اس لیے یوکرین پر حملے کا اب بھی امکان ہے۔

انہوں نے مزید کہا کہ روس نے اب یوکرین کے ساتھ سرحد پر تقریباً 1 لاکھ 50 ہزار فوجیوں کو جمع کردیا ہے۔

 واضح رہے کہ گزشتہ روز اطلاعات سامنے آئی تھیں کہ یوکرین اور روس کے درمیان جنگ کا خطرہ ٹلنے لگا ہے اور یوکرین کی سرحد پر تعینات روسی فوجیوں میں سے بعض دستوں کی واپسی ہوگئی ہے۔

گذشتہ روز روسی وزارت دفاع کے ترجمان ایگور کوناشینکوف کا بیان سامنے آیا تھا جس میں انہوں نے کہا تھا کہ جنوبی اور مغربی فوجی اضلاع کے جن یونٹس نے اپنے مشن مکمل کر لیے ہیں، وہ آج سے اپنے گیریژنوں میں منتقل ہونا شروع کردیں گے۔

انہوں نے کہا تھا کہ منصوبہ بندی کے مطابق متعدد جنگی تربیتی مشقیں منعقد کی گئی تھیں جواب ختم کی جارہی ہیں۔

دوسری جانب امریکی وزیرخارجہ کا روسی ہم منصب سے ٹیلی فونک رابطہ ہوا ہے جس میں امریکہ نے سفارتکاری کے ذریعے یوکرین کا معاملہ حل کرانے پر زور دیا ہے۔

خیال رہے کہ روسی صدر ولادمیر پیوٹن ہمیشہ ہی اس بات سے انکاری نظر آتے ہیں کہ روس یوکرین پر حملہ کرے گا اور ان کا کہنا ہے کہ ہم یورپ میں ایک اور جنگ نہیں چاہتے۔