یورپی یونین کے کمیشن نے گیس اور جوہری توانائی کو ’’گرین‘‘ یعنی ماحول دوست قرار دے دیا ہے۔ دوسری جانب اِس فیصلے پر تنقید بھی کی جا رہی ہے۔

آسٹریا نے یورپی کمیشن کے اس فیصلے کو چیلنج کرنے کا اعلان کیا ہے جس کے تحت جوہری توانائی کے شعبے میں سرمایہ کاری کے لیے ‘سسٹین ایبل فائنانس‘ لیبل دینے کا اعلان کیا گیا ہے۔

آج آسٹریا کی وزیر ماحولیات لیونور گیویسلر نے کہا ہے کہ یورپی کمیشن کے اس فیصلے کے خلاف آسٹریا یورپی عدالتِ انصاف سے رجوع کرے گا۔

اُن کا کہنا تھا کہ لکسمبرگ پہلے ہی اِس فیصلے خلاف عدالت سے رجوع کرنے کا اعلان کر چکا ہے کیوںکہ اس فیصلے سے یورپی بلاک کے مستقبل کو خطرات کا سامنا کرنا پڑ سکتا ہے۔

آسٹریا کی وزیر ماحولیات لیونورے گیویسلر نے کہا کہ جوہری توانائی پرانی اور مہنگی ہے اور اس سے سلامتی کے شدید خدشات پیدا ہوتے ہیں۔

یہ امر اہم ہے کہ یورپی کمیشن نے ماحول دوست تنظیموں کے احتجاج اور تنقید کو نظر انداز کرتے ہوئے گیس اور جوہری توانائی کے شعبوں میں سرمایہ کاری کو ’’گرین انویسٹمنٹ‘‘ کا لیبل دینے کا اعلان کیا ہے۔

یورپی کمیشن کے مطابق گیس اور جوہری توانائی کلین پاور ذرائع کے تناظر میں خاصے مددگار ہیں اور ان کے استعمال سے مستقبل میں زیرو کاربن کا ہدف حاصل کیا جا سکتا ہے۔

یورپی کمیشن کے مطابق جوہری بجلی اور گیس سے حاصل کردہ توانائی سسٹین ایبل ہے تاہم ناقدین کا کہنا ہے کہ یورپی یونین اِن ذرائع توانائی کو غلط طریقے سے درست قرار دے رہا ہے۔

فیصلے پہ تنقید کرنے والوں کے مطابق اِس سے یورپی یونین نے 2050ء تک یورپی بلاک کو کلائمیٹ نیوٹرل کرنے کے اپنے ہی ہدف کو خطرات سے دو چار کر دیا ہے۔