بھارتی ریاست کرناٹک میں انتہا پسند جتھے کے سامنے ڈٹ جانے والی مسکان خان کے لیے مختلف تنظیموں نے اعزازات کا اعلان کیا ہے۔

غیر ملکی خبر رساں ادارے کی رپورٹ کے مطابق بھارتی ریاست کرناٹک میں انتہا پسند جتھے کے سامنے ڈٹ جانے والی مسکان خان کی جرات و بہادری کو سراہنے کے لیے مختلف تنظیموں نے اعزازات کا اعلان کیا ہے۔

بھارتی ریاست تامل ناڈو میں مسلمانوں کے حقوق کے لیے کام کرنے والی ایک تنظیم ’تامل ناڈو مسلم منیترہ کزہگم‘ نے مسکان خان کو فاطمہ شیخ ایوارڈ دینے کا اعلان کیا ہے۔

تنظیم کا اپنے بیان میں کہنا تھا کہ مسکان کو بحیثیت بھارتی شہری اپنے حقوق کے تحفظ کے لیے ڈٹ جانے پر یہ ایوارڈ دیا جارہا ہے۔

واضح رہے کہ فاطمہ شیخ تقسیم ہند سے قبل برصغیر کی پہلی مسلمان معلمہ اور سماجی کارکن تھیں۔

دوسری جانب بھارتی ریاست جھاڑکھنڈ کی ایک سماجی تنظیم انجم ابرار فاؤنڈیشن نے بھی مسکان خان کے لیے ایک لاکھ روپے نقد انعام کا اعلان کیا ہے۔

خیال رہے کہ گذشتہ دنوں بھارتی ریاست کرناٹک کے کالج میں ایک سکینڈ ایئر کی نہتی باحجاب طالبہ مسکان خان کی ویڈیو سوشل میڈیا پر وائرل ہوئی تھی۔

ویڈیو میں دیکھا گیا ہے کہ مسکان اپنی اسکوٹی سے جیسے ہی کالج میں داخل ہوتی ہے تو کئی ہندو انتہاپسند طلبا مسکان کے قریب بڑھتے ہوئے جے شری رام کا نعرہ لگاتے ہیں۔

تاہم مسکان ان ہندو انتہاپسند طلبا سے بغیر ڈرے نڈر ہوکر ان کا ڈٹ کر مقابلہ کرتی ہیں اور نعرہ تکبیر بلند کرتی ہوئی کالج کی عمارت کی جانب بڑھتی ہیں۔

اس ویڈیو کے منظر عام پر آنے کے بعد مسکان کی بہادری کے قصے ہر زبان پر زد عام ہوگئے اور سوشل میڈیا سمیت ہر طرف ان کی دلیری کو خوب سراہا گیا ہے۔