برطانوی وزیراعظم بورس جانسن نے پارلیمنٹ سے خطاب میں کہا ہے کہ یہ کہنے کا کوئی فائدہ نہیں کہ 10 ڈاؤننگ اسٹریٹ میں ہونے والی پارٹیاں قواعد کے اندر تھیں یا نہیں۔

بورس جانسن نے کہا کہ وہ معاملات جنہیں درست انداز میں نہیں لیا گیا اور جس طرح اس معاملے سے نمٹا گیا اس پر وہ معذرت خواہ ہیں۔

انہوں نے کہا کہ کورونا وبا کے دوران ہم نے اس ملک کے لوگوں سے غیر معمولی قربانیاں مانگیں۔ وزیراعظم کا کہنا ہے کہ وہ لوگوں کے غصے کو سمجھتے ہیں اور اِس پر افسوس کا اظہار کرنا کافی نہیں ہے۔

وزیراعظم کا کہنا ہے کہ وہ 10 ڈاؤننگ اسٹریٹ اور کیبنٹ آفس کی پالیسی میں تبدیلیاں لا رہے ہیں، اب وقت آگیا ہے کہ سول سروس کے ضابطہ اخلاق پر نظرثانی کی جائے۔

برطانوی سول سرونٹ سُو گرے کی رپورٹ بورس جانسن کی وزارت عظمیٰ کے لیے بہت اہم ہے جو 10 ڈاؤننگ اسٹریٹ میں کورونا لاک ڈاؤن کے دوران ہونے والی پارٹیوں کی تحقیقات پر مبنی ہے۔

سُو گرے کی رپورٹ میں کہا گیا ہے کہ وزیراعظم کی سرکاری رہائش 10 ڈاؤننگ اسٹریٹ پر 2020ء میں ہونے والی پارٹیوں میں ایسا کچھ نہیں ہوا تھا جسے کورونا پابندیوں کے قواعد و ضوابط کی خلاف ورزی کہا جا سکے۔

10 ڈاؤننگ اسٹریٹ میں لاک ڈاؤن پارٹیوں کے بارے میں رپورٹ کے ابتدائی نتائج عوام کے لیے جاری کر دیے گئے ہیں جن پر برطانوی وزیراعظم بورس جانسن اپنی سیاسی جماعت کنزرویٹو پارٹی کے ارکان سے خطاب بھی کریں گے۔

یہ رپورٹ سینئر سول سرونٹ سُو گرے کی طرف سے آج ہی 10 ڈاؤننگ اسٹریٹ کے سپرد کی گئی تھی۔ اس رپورٹ کو مکمل طور پر شائع نہیں کیا جا رہا کیونکہ پولیس اِس حوالے سے انتہائی سنگین الزامات کی تحقیقات کر رہی ہے۔

بورس جانسن کی اپنی جماعت کنزرویٹو پارٹی کے بہت سے ارکانِ پارلیمنٹ نے کہا ہے کہ وہ اس رپورٹ کے نتائج کا انتظار کر رہے ہیں تاکہ اُنہیں عہدے سے ہٹانے یا نہ ہٹانے کا فیصلہ کیا جائے۔

اگر کنزرویٹو پارٹی کے عموماً خاموش رہنے والے ارکان جنہیں ’’بیک بینچ کمیٹی‘‘ کے ارکان بھی کہا جاتا ہے، وزیراعظم کے خلاف تحریک عدم اعتماد پیش کرتے ہیں تو 54 ارکان اس پر دستخط کرنے کے لیے تیار ہیں۔