نئی دہلی: بھارت میں برصغیر کی لیجنڈری گلوکارہ لتا منگیشکر کی یاد میں دو روزہ قومی سوگ کا اعلان کیا گیا ہے۔

بھارتی میڈیا کے مطابق برصغیر کی لیجنڈری گلوکارہ لتا منگیشکر کی یاد میں دو روزہ قومی سوگ منایا جائے گا جبکہ اس موقع پر قومی پرچم احترام کے طور پر دو دن سر نگوں رہے گا۔

واضح رہے کہ لتا منگیشکر کورونا کے سبب ممبئی کے کینیڈی اسپتال کے انتہائی نگہداشت وارڈ میں زیر علاج تھیں، جہاں وہ 92 سال کی عمر میں اس جہان فانی سے کوچ کرگئی ہیں۔

لتا منگیشکر کے معالج پریت سمدھانی نے پریس کانفرنس میں ان کے انتقال کی تصدیق کرتے ہوئے بتایا کہ لتا جی کو نئے سال کے آغاز پر کورونا کے سبب اسپتال میں داخل کیا گیا تھا۔ تاہم حالت تشویش ناک ہونے پر انہیں وینٹی لیٹر پر منتقل کردیا گیا تھا۔

ڈاکٹر پریت سمدھانی کے مطابق کورونا کے بعد وہ نمونیا میں مبتلا ہوگئیں تھی جس کی وجہ سے ان کے اعضائے ریئسہ نے کام کرنا چھوڑ دیا تھا۔

 آنجہانی گلوکارہ سات دہائیوں تک اپنی سریلی آواز سے دنیا بھر میں موجود اپنے کروڑوں مداحوں کے کانوں میں رس گھولتی رہیں، ان کے گائے ہوئے کئی گانوں نے مقبولیت کے نئے ریکارڈ قائم کیے۔

بھارتی حکومت کی جانب سے ان کی فنی خدمات کے اعتراف میں انہیں تین بڑے سرکاری اعزازات سے نوازا گیا، جن میں پدما و بھوشن، بھارت رتن اور پدم بھوشن شامل ہیں۔