کینیڈا اور امریکا کے درمیان اہم تجارتی گزرگاہ پر مظاہرہ کرنیوالے ٹرک ڈرائیوروں کو ہٹانے کی غرض سے پولیس اہلکاروں کی آمد شروع ہوگئی ہے۔

کینیڈا میں کورونا پابندیوں اور لازمی ویکسین کے قانون کے خلاف کئی دنوں سے ٹرک ڈرائیوروں کا احتجاج جاری ہے۔

مظاہرین کی جانب سے کھڑی کی گئی رکاوٹوں کے باعث دونوں ممالک کے درمیان اشیاء کی ترسیل کا عمل متاثر ہوا اور دونوں طرف آٹو انڈسٹری کو اپنی پیداوار معطل کرنا پڑی۔

امریکی خبر رساں ادارے ایسوسی ایٹڈ پریس کے مطابق ہفتے کی صبح پولیس نے احتجاج کے مقام پر پہنچنا شروع کردیا تھا جس کے بعد اکثر مظاہرین منتشر ہونا شروع ہوگئے۔ اِس سے پیشتر مظاہرین نے مصروف ترین گزرگاہ پر رات گزاری۔

پولیس نے ٹویٹ کیا کہ ونڈسر پولیس نے قانون پر عمل درآمد کا آغاز کردیا ہے۔ تمام مظاہرین قانون کے مطابق اور پرامن قدم اٹھائیں۔ پیدل چلنے والے بھی متاثرہ علاقوں میں جانے سے گریز کریں۔

The Windsor Police & its policing partners have commenced enforcement at and near the Ambassador Bridge. We urge all demonstrators to act lawfully & peacefully. Commuters are still being asked to avoid the areas affected by the demonstrations at this time.

— Windsor Police (@WindsorPolice) February 12, 2022

تاہم تین بڑے ٹرکوں اور دو درجن کے قریب مظاہرین کے باعث ابھی بھی ٹریفک رکی ہوئی ہے جنہوں نے پولیس کے پہنچنے پر کینیڈا کا قومی ترانہ گانا شروع کردیا۔

گزشتہ روزاونٹاریو صوبے کے پریمیئر ڈوگ فورڈ نے صوبے میں ایمرجنسی نافذ کر دی تھی جس کے تحت غیرقانونی طور پر سڑکیں، پل اور گزرگاہیں بند کرنے والوں کو ایک لاکھ ڈالر جرمانہ اور ایک سال تک قید کی سزا دی جا سکتی ہے۔

سپریم کورٹ کے چیف جسٹس جیفری موراویٹز نے کینیڈا اور امریکا کی سرحد پر ایمبیسیڈر پل سے مظاہرین کو ہٹانے کے احکامات جاری کیے تھے۔ چیف جسٹس نے مظاہرین کو شام سات بجے تک کا وقت دیا تھا تاہم ڈیڈ لائن گزرنے کے باوجود اُنہوں نے رکاوٹیں نہیں ہٹائیں۔

ونڈسر پولیس نے انتباہ جاری کیا ہے کہ گلیاں بند کرنے والوں کو گرفتار کیا جائے گا اور ان کی گاڑیاں تحویل میں لے لی جائیں گی۔

ایمبیسیڈر پل امریکا اور کینیڈا کے درمیان مصروف ترین گزرگاہ ہے جو دونوں ممالک کے درمیان ہونے والی 25 فیصد تجارت کا ذریعہ ہے۔