روسی افواج نے یوکرائن کے دارالحکومت کیف کو اِس وقت محاصرے میں لے رکھا ہے۔

کیف کے میئر ویٹالی کلٹسکو نے شہر کے گرد روسی محاصرے کی تصدیق کرتے ہوئے کہا ہے کہ روسی فوج شہر سے باہر جانے کے تمام راستے بند کر رہی ہے۔

میئر ویٹالی کلٹسکو نے صحافیوں کے سوال کا جواب دیتے ہوئے کہا کہ شہر پر قبضے کی صورت میں شہریوں کا انخلا ممکن نہیں کیونکہ تمام راستے بند ہیں۔ میئر کیف کا مزید کہنا تھا کہ فضائی حملوں کی آوازیں شہر میں گونج رہی ہیں۔

یوکرائن کے دارالحکومت کیف میں لگایا جانے والا کرفیو آج صبح ہٹا دیا گیا ہے۔

شہریوں کو زیر زمین پناہ گاہوں سے نکلنے، کھانے پینے کی اشیاء کی خرید و فروخت، دکانیں کھولنے کی اجازت دی گئی ہے۔ پبلک ٹرانسپورٹ بھی چلنا شروع ہوگئی ہے۔

دارالحکومت میں کرفیو رات 10 بجے دوبارہ شروع ہوگا جو کل صبح 7 بجے تک نافذ رہے گا۔

گزشتہ دو روز کے دوران دارالحکومت کیف کے مضافاتی علاقوں میں کئی دھماکے ہوئے۔ شہر کے مرکز میں کوئی روسی میزائل حملہ نہیں ہوا تاہم اس کا خدشہ برقرار ہے۔

دارالحکومت پر اب تک یوکرائن کا کنٹرول ہے۔ کیف کے حکام نے خبردار کیا ہے کہ جنگ ابھی ختم نہیں ہوئی اور شہر کے تقریباً ہر ضلع میں سڑکوں پر لڑائی جاری ہے۔

کیف کے رہائشیوں کو صرف بہت ضرورت کے تحت دن کے وقت گھروں اور پناہ گاہوں کو چھوڑنے کی اجازت دی گئی ہے۔