کینیڈین وزیراعظم جسٹن ٹروڈو نے کورونا ویکسین کے خلاف مزاحمتی تحریک کو ناقابل قبول قرار دے دیا۔

خبر رساں ادارے اے ایف پی کے مطابق وزیراعظم جسٹن ٹروڈو نے پارلیمنٹ سے خطاب میں کہا کہ رکاوٹیں اور غیر قانونی مظاہرے ناقابل قبول ہیں اور اس سے کاروبار و مینوفیکچرنگ کے شعبے پر منفی اثرات مرتب ہو رہے ہیں۔

وزیراعظم جسٹن ٹروڈو نے مظاہرین سے مخاطب ہو کر کہا کہ آپ رکاوٹیں کھڑی کرکے وبا کو ختم نہیں کر سکتے، اسے سائنس کے ذریعے صحت عامہ سے متعلق اقدامات لیتے ہوئے ہی ختم کرنا ہوگا۔

اس سے قبل وائٹ ہاؤس کی پریس سیکرٹری جین ساکی نے کہا تھا کہ امریکی حکام کینیڈین سرحدوں پر تعینات پولیس اہلکاروں سے رابطے میں ہیں۔

جین ساکی نے مظاہروں کے امریکی معیشت پر پڑنے والے اثرات پر تشویش کا اظہار کرتے ہوئے کہا کہ اس سے سپلائی چین اور آٹو انڈسٹری کو خطرہ لاحق ہے۔

خیال رہے کہ امریکا اور کینیڈا کے درمیان ایمبیسیڈر پُل ایک اہم تجارتی گزرگاہ ہے جہاں سے روزانہ 40 ہزار سے زیادہ پیدل چلنے والے افراد، سیاحوں اور  32 کروڑ 30 لاکھ ملین ڈالر مالیت کی اشیاء لے جانے والے ٹرکوں کا گزر ہوتا ہے۔

کینیڈا اور امریکی چیمبر آف کامرس سے وابستہ کئی ایسوسی ایشنز پُل پر سے رکاوٹیں ہٹانے کا مطالبہ بھی کرچکی ہیں جن کا کہنا ہے کہ عالمی وبا کے اث کے بعد سرحدی تجارت کو نقصان پہنچانے کی اجازت نہیں دی جا سکتی۔

کانوائے فریڈم نامی یہ تحریک سرحد کے دونوں طرف ٹرک ڈرائیورز کے لیے ویکسین لازمی قرار دیے جانے کے خلاف شروع ہوئی تاہم بعد میں اس کا رُخ حکومت کے خلاف ہوگیا۔

مظاہرین نے تقریباً دس روز سے اوٹاوا کو بند کیا ہوا ہے جن میں سے کچھ نے نازی پرچم اٹھا رکھے ہیں جبکہ کچھ کا کہنا ہے کہ وہ کینیڈا کی حکومت کا خاتمہ چاہتے ہیں۔

کینیڈا کی پولیس نے کورونا ویکسین اور پابندیوں کے خلاف احتجاج کرنے والے ٹرک ڈرائیوروں کو گرفتار کرنے کی دھمکی دی ہے۔