ابو ظہبی نے اپنی گرین لسٹ کو اپڈیٹ کردیا ہے جس کے تحت 15 فروری سے ابو ظہبی آنے والوں کے لیے نئے سفری ضوابط مقرر کردیے گئے ہیں۔

غیر ملکی خبر رساں ادارے کے مطابق ابوظہبی کے محکمہ ثقافت و سیاحت نے گرین لسٹ کو اپڈیٹ کیا ہے جس کے تحت ابوظہبی میں آنے والوں کے لیے نئے سفری ضوابط مقرر کیے ہیں۔

محکمہ ثقافت و سیاحت نے گرین لسٹ میں شامل ممالک سے آنے والے ویکسین شدہ افراد کو قرنطینہ سے استثنی قرار دیا ہے لیکن انہیں ابوظہبی پہنچنے کے بعد چھٹے دن پی سی آر ٹیسٹ کروانا ہوگا۔

علاوہ ازیں گرین لسٹ میں شامل ممالک کے غیر ویکسین شدہ افراد کو بھی قرنطینہ نہیں کرنا ہوگا جبکہ انہیں اپنے قیام کے چھٹے اور نویں دن پی سی آر ٹیسٹ کروانا ہوگا۔

          واضح رہے کہ ابو ظہبی کی گرین لسٹ میں سعودی عرب سمیت عمان، ترکی، مراکش، کویت، ملائیشیا اور سنگاپور شامل ہیں۔

علاوہ ازیں گرین لسٹ میں برازیل، تاجکستان، بحرین، امریکہ، بوسنیا، پرتگال، الجزائر، چین، عراق، میانمار، فلپائن، آذربائیجان، یمن، ازبکستان، فن لینڈ، مالدیپ، اسرائیل، انڈونیشیا، تیونس سمیت ایران اور 75 ممالک شامل ہیں۔

یا رہے کہ ابوظہبی حکومت کے اس اقدام کے بعد 15 فروری 2022 سے گرین لسٹ میں شامل ممالک کے افراد براہ راست ابو ظہبی میں داخل ہوسکتے ہیں۔

دوسری جانب دبئی میں کورونا وائرس کے حوالے سے عائد کی گئی پابندیاں بتدریج ختم کرنے کا اعلان کیا گیا ہے جس کے بعد گذشتہ روز سے دبئی کے سنیما گھروں میں مکمل گنجائش کے ساتھ فلم دیکھنےکی اجازت ہوگی۔

علاوہ ازیں دبئی حکومت نے تجارتی و کاروباری مرکز میں بھی سماجی سرگرمیوں، تقریبات اور اجتماعات میں مکمل گنجائش کے ساتھ شرکت کی اجازت دی ہے۔