نوکوالوفا: ٹونگا کے دارالحکومت میں کورونا کیسز کے متعدد کیسز رپورٹ ہوئے ہیں جس کے بعد لاک ڈاؤن لگنے کا امکان ہے۔

میڈیا رپورٹس کے مطابق ٹونگا کے دارالحکومت نوکوالوفا میں کووڈ کے متعدد کیسز رپورٹ ہونے کے بعد لاک ڈاؤن لگنے کا امکان ہے جبکہ ٹونگا کی بندرگاہ پر دو کیسز رپورٹ ہوئے ہیں۔

واضح رہے کہ ٹونگا کی یہ وہ بندرگاہ ہے جہاں حال ہی میں آتش فشاں پھٹنے اور سونامی کے بعد انسانی امداد پہنچ رہی ہے جبکہ اب تک وہاں کی تمام امدادی ترسیل کو وائرس کے پھیلاؤ کو روکنے کے لیے کنٹیکٹ لیس پروٹوکول کے ذریعے ہینڈل کیا گیا ہے۔

میڈیا رپورٹس کے مطابق ٹونگا کے حکمران کا کہنا ہے کہ آج شام سے لاک ڈاؤن لگا دیا جائے گا اور ہر 48 گھنٹے بعد صورت حال کا جائزہ لیا جائے گا۔

مزید پڑھیے: ٹونگا کے آتش فشاں سے ایٹم بم پھٹنے سے زیادہ توانائی نکلی

یاد رہے کہ ٹونگا 2020 کے اوائل میں بیرونی دنیا کے لیے اپنی سرحدیں بند کرنے کے بعد سے دور دراز جزیرے کی قوم کووڈ سے نسبتاً محفوظ رہنے کے لیے دنیا کے چند مقامات میں سے ایک تھی۔

خیال رہے کہ ٹونگا میں آتش فشاں کے پھٹنے کے بعد سونامی نے قوم کو تباہ و برباد کردیا ہے جبکہ ٹونگا اس وقت غیر ملکی امداد پر بہت زیادہ انحصار کر رہا ہے۔

ٹونگا کو پینے کے صاف پانی، شیلٹر کٹس اور امدادی سامان کی فراہم کرنے والے ممالک میں آسٹریلیا اور نیوزی لینڈ سب سے آگے ہیں۔