بھارت میں حجاب کے ساتھ امتحان دینے کی اجازت نہ ملنے پرکرناٹک کے سرکاری اسکول کی طالبات نے امتحانات کا بائیکاٹ کردیا ہے۔

بھارتی میڈیا کے مطابق ریاست کرناٹک کے سرکاری اسکول میں انتظامیہ نے امتحانات میں بیٹھنے کے لئے طالبات سے حجاب اتارنے کا مطالبہ کیا جس پر اسکول کی طالبات نے حجاب اتارنے کے بجائے احتجاجاً امتحانات کا بائیکاٹ کردیا۔

یہ بھی پڑھیں: بھارت میں مسلم طالبہ حجاب اتارنے پر مجبور، ویڈیو وائرل

طالبات کا کہنا تھا کہ اسکول پرنسپل اورانتظامیہ سے حجاب کے ساتھ امتحان دینے کی اجازت دینے کے لئے متعدد باردرخواست کی لیکن انہوں نے درخواست پرکوئی توجہ نہیں دی۔

واضح رہے کہ بارتی ریاست کرناٹک کے تعلیمی اداروں میں حجاب پر پابندی کے بعد ریاست کے مختلف شہروں میں کشیدگی برقرار ہے جبکہ طالبات کی جانب سے احتجاج بھی کیا جارہا ہے۔

یہ بھی پڑھیں: ایک دن باحجاب لڑکی بھارت کی وزیر اعظم ہوگی، اسد الدین اویسی

دوسری جانب بھارت میں حجاب تنازع کو لے کر بند ہونے والے تعلیمی اداروں کو دوبارہ کھول دیا گیا ہے تاہم ابتدائی مراحل میں پرائمری اسکولوں کو کھولا گیا ہے۔

کرناٹک کے وزیراعلیٰ نے امید ظاہر کی کہ ان کے اس اقدامات سے ریاست میں امن قائم ہوگا اور یہاں کے حالات دیکھنے کے بعد ہائی اسکولز سمیت کالج اور یونیورسٹیز بھی کھولنے کا فیصلہ کیا جائے گا۔