ممبئی: لیجنڈ گلوکارہ لتا منگیشکر کی میت شیواجی پارک ممبئی منتقل کی جارہی ہے۔

بھارتی میڈیا کے مطابق برصغیر کی عظیم گلوکارہ لتا منگیشکر کی میت ٹرک پر شیواجی پارک ممبئی منتقل کی جارہی ہے۔

اس موقع پر مختلف راستوں پر مداحوں کی بڑی تعداد جمع ہے جبکہ میت کو قافلے کی شکل میں شیواجی پارک لایا جارہا ہے۔

واضح رہے کہ لتا منگیشکر کی آخری رسومات شیواجی پارک میں 6:30 بجے ادا کی جائیں گی۔

یاد رہے کہ طویل عرصے تک بھارتی فلموں میں اپنی آواز کے ذریعے راج کرنے والی لتا منگیشکر آج صبح اس دار فانی سے کوچ کرگئیں تھیں۔

لتا منگیشکر کے معالج پریت سمدھانی کا لتا منگیشکر کے انتقال کی تصدیق کرتے ہوئے کہنا تھا کہ لتا جی کو نئے سال کے آغاز پر کورونا کے سبب اسپتال میں داخل کیا گیا تھا تاہم حالت تشویش ناک ہونے پر انہیں وینٹی لیٹر پر منتقل کردیا گیا تھا۔

ڈاکٹر پریت سمدھانی کے مطابق کورونا کے بعد وہ نمونیا میں مبتلا ہوگئیں تھی، جس کی وجہ سے ان کے اعضائے ریئسہ نے کام کرنا چھوڑ دیا تھا۔

خیال رہے کہ بھارتی حکومت کی جانب سے ان کی فنی خدمات کے اعتراف میں انہیں تین بڑے سرکاری اعزازات سے نوازا گیا تھا جن میں پدما و بھوشن، بھارت رتن اور پدم بھوشن شامل ہیں۔