امریکی ریاست کیلیفورنیا کے شہر اوروول میں بس میں ہونے والی فائرنگ کے نتیجے میں ایک خاتون ہلاک جبکہ 5 افراد زخمی ہوگئے۔

ایسوسی ایٹڈ پریس نے بیوٹ کاؤنٹی کے شیرف کوری ہونیا کے حوالے سے بتایا ہے کہ گزشتہ شام 21 سالہ اساہدی کولمین نے اس وقت لاس اینجلس جانے والی بس پر فائرنگ کر دی جب وہ ایک اسٹور پر رکی اور مسافر باہر نکل رہے تھے۔

پولیس کو ساڑھے سات بجے 911 پر کال موصول ہوئی کہ اوروول کے ایک اسٹور کے باہر ایک شخص بس پر فائرنگ کر رہا ہے جس پر پولیس فوری طور پر وہاں پہنچی۔

بس سے درجن بھر نائن ایم ایم کے خول برآمد ہوئے جبکہ حملہ آور سے ہتھیار بھی برآمد کرلیا گیا ہے۔

شیرف کوری ہونیا کا مزید کہنا تھا کہ گولیاں چلانے سے قبل حملہ آور بس پر چڑھا اور یہ کہتے ہوئے کہ لاس اینجلس ایک خطرناک شہر ہے، بس میں سوار ایک مسافر کو خفیہ ادارے کا اہلکار قرار دے کر فائرنگ شروع کردی۔

گولیاں چلانے کے بعد کولمین وہاں سے فرار ہو گیا اور نصف میل دور جا کر ایک شخص کے ساتھ جھگڑا شروع کر دیا۔ لوگوں نے بیچ بچاؤ کرایا تو اس نے کپڑے اتارنا شروع کر دیے۔

تاہم تھوڑی دیر بعد ہی پولیس نے موقع پر پہنچ کر اُسے برہنہ حالت میں گرفتار کرلیا۔

شیرف کا کہنا تھا کہ واقعے میں 32 سالہ مسافر کو کئی گولیاں لگیں جبکہ ایک حاملہ خاتون بھی شدید زخمی ہیں۔ ایک 11 سالہ بچی بھی زخمی ہوئی جس کی حالت خطرے سے باہر ہے جبکہ ایک 38 سالہ خاتون معمولی زخمی ہوئی ہیں۔

بیوٹ کاؤنٹی کے ڈسٹرکٹ اٹارنی ڈیوڈ رمسی کا کہنا ہے کہ حملہ آور اساہدی کولمین کا کم عمری میں ہی مجرمانہ سرگرمیوں کا ریکارڈ ہے جبکہ وہ غیر قانونی اسلحہ رکھنے پر بھی پولیس کو مطلوب تھا۔

دو سال پہلے بھی انتھونی ڈیوونٹ نامی ایک شخص نے سان فرانسسکو جانے والی ایک بس پر فائرنگ کرکے ایک شخص کو ہلاک اور پانچ کو زخمی کر دیا تھا۔