نئی دہلی: بھارتی وزیر اعظم نریندر مودی نے روسی صدر ولادیمیر پیوٹن کو نیٹو سے مذاکرات کا مشورہ دیا ہے۔

بھارتی میڈیا کے مطابق وزیر اعظم نریندر مودی کا روسی صدر ولادیمیر پیوٹن سے رابطہ ہوا ہے جس میں انہوں نے روس کے یوکرین کے ساتھ جاری تنازع کے دوران تشدد کے خاتمے کی اپیل کی ہے۔

یہ بھی پڑھیں: روس کا یوکرین پر حملوں کا سلسلہ جاری، 137 ہلاکتوں کی تصدیق

بھارتی میڈیا کا کہنا ہے کہ نریندر مودی کے دفتر کی جانب جاری کردہ بیان میں کہا گیا ہے کہ روسی صدر نے وزیر اعظم مودی کو یوکرین کی تازی صورتحال کے بارے میں بریف کیا ہے۔

جاری کردہ بیان کے مطابق بھارتی رہنما نے اس بات پر زور دیا کہ نیٹو اور روس کے اختلافات مخلصانہ مذاکرات کے ذریعے حل کیے جا سکتے ہیں۔

بیان میں کہا گیا ہے کہ مودی نے روسی صدر کو اپنے تحفظات کے بارے میں آگاہ کیا ہے جبکہ یوکرین میں موجود انڈین شہریوں خاص کر طلبا کے بارے میں بتایا اور کہا کہ بھارت ان کے فوری انخلا کے لیے کوشاں ہے۔

واضح رہے کہ روس کی جانب سے دوسرے دن بھی یوکرین پر حملے مسلسل جاری ہیں جبکہ اب تک کی اطلاعات کے مطابق 137 شہری اور فوجی ہلاک ہوچکے ہیں۔

دوسری جانب برطانوی سیکرٹری دفاع نے دعوی کیا ہے کہ یوکرین پر حملے میں 450 روسی اہلکار بھی ہوئے ہیں۔

برطانیہ کے سیکرٹری دفاع کا بی بی سی ریڈیو سے بات کرتے ہوئے کہنا تھا کہ برطانوی خفیہ سروسز کی مصدقہ جائزے کے مطابق روس حملے کے پہلے روز اپنے کسی بھی مقصد کو پورا کرنے میں ناکام رہا ہے۔