یوکرائن نے دعویٰ کیا ہے کہ روسی فوج شمالی اور مشرقی یوکرائن میں داخل ہوگئی ہے جبکہ اُس کی فوجوں نے 50 روسی فوجی ہلاک کر دیے ہیں۔

یوکرائن کی بارڈر گارڈ سروس کے مطابق روسی فوجیوں کے قافلے شمالی چرنیہیو اور سومی کے علاقوں اور مشرقی لوہانسک اور خارخیو کے علاقوں سے یوکرائن میں داخل ہو گئے ہیں۔

روسی حملے سے پہلے توپ خانوں سے گولہ باری کی گئی جس کے نتیجے میں یوکرائن کے سرحدی محافظ زخمی ہوئے ہیں۔

یوکرائنی فوج نے شیہستیا کے علاقے میں روسی حملے کو پسپا کرنے اور 50 روسی فوجیوں کو ہلاک کرنے کا دعویٰ کیا ہے۔

یوکرائن کی زمینی افواج نے دعویٰ کیا ہے کہ شیہستیا کا علاقہ ان کے قبضے میں ہے اور 50 سے زائد روسی فوجی مارے گئے ہیں۔

انھوں نے روسی فوج کے دو ٹینک اور کئی ٹرکوں کو تباہ کرنے کا بھی دعویٰ کیا ہے۔

سرحدی محافظ اور مسلح افواج دشمن کو روکنے کے لیے ہر قسم کے اقدامات کر رہے ہیں۔

دوسری جانب یوکرائن کے پولیس حکام نے دعویٰ کیا ہے کہ روسی فوجوں کی بمباری سے کم از کم سات افراد ہلاک ہو چکے ہیں۔

پولیس حکام کا کہنا ہے کہ اوڈیسا کے باہر پولڈیسک میں فوجی یونٹ پر ہونے والے حملے میں کم از کم 7 افراد ہلاک اور اتنے ہی زخمی ہوئے ہیں۔ پولیس کے مطابق 19 افراد لاپتہ ہیں۔