روس کا یوکرین پر حملوں کا سلسلہ دوسرے روز بھی جاری جس میں اب تک 137 ہلاکتوں کی تصدیق ہوچکی ہے۔

غیر ملکی خبر رساں ادارے کے مطابق روس کا یوکرین پر حملوں کا سلسلہ جاری ہے جبکہ یوکرین کےدارالحکومت کیف میں 2 دھماکے سنے گئے ہیں۔

رپورٹ کے مطابق کیئو کے وسطی علاقے میں دو بڑے دھماکوں کی آواز سنائی دی گئی ہے جبکہ جمعے کی صبح ہی ایک تیسرے بڑے دھماکے کی اطلاعات بھی سامنے آئی ہیں۔

یوکرینی خبر رساں ایجنسی یونیان کے مطابق سابق ڈپٹی وزیرِ داخلہ اینٹون ہیراشینکو کا کہنا ہے کہ انہوں نے دو دھماکوں کی آواز سنی ہے۔

ان کا مزید کہنا تھا کہ کروز یا بیلسٹک میزائل استعمال کیے گئے ہیں تاہم یوکرین کی فوج نے تاحال اس حوالے سے کوئی بیان نہیں دیا ہے۔

ترک میڈٰیا کے مطابق روسی فوجیوں کی کیف کی جانب پیش قدمی جاری ہے جبکہ امریکہ نے اتوار تک کیف پر روسی قبضے کا امکان ظاہر کردیا ہے۔

یوکرینی صدر کا کہنا ہے کہ پہلے روز روسی حملےمیں 137 افراد ہلاک اورسینکڑوں زخمی ہوئے ہیں جن میں فوجی اورسویلین دونوں شامل ہیں۔

انہوں نے عوام کو متحرک کرنے کے لیے ایک حکم نامے پر دستخط کیے ہیں جس کے ذریعے 90 دنوں کے لیے فوج میں نئے لوگوں کو بھرتی کیا جائے گا اور ریٹائرڈ یا ریزوو فوجیوں کو واپس بلایا جائے گا۔

ادھر یوکرین میں اسٹیٹ بارڈر گارڈ سروس کا کہنا ہے کہ 18 سے 60 سال عمر کے مردوں پر ملک سے باہر جانے پر پابندی ہوگی۔