ریاض: سعودی عرب میں سعودی شہریوں کے نام پر کاروبار کرنے والے غیرملکیوں سمیت سعودی شہریوں کے خلاف سخت کاروائی کا فیصلہ کیا گیا ہے۔

غیر ملکی خبر رساں ادارے کے مطابق سعودی وزارت تجارت و سرمایہ کاری کی جانب سے سعودی شہریوں کے نام پر کاروبار کرنے والے غیر ملکیوں کو دی جانے والی مہلت 16 فروری کو ختم ہو رہی ہے۔

سعودی حکام کا کہنا ہے کہ غیر قانونی طور پر کاروبار کرنے والے غیر ملکیوں سمیت سعودی شہریوں کے خلاف بھی کاروائی عمل میں لائی جائے گی۔

حکام کا کہنا تھا کہ ایسے وہ تمام غیر ملکی جو اس جرم کا مرتکب ہو رہے ہیں وہ اپنے کاروبار کو سعودی قانون کے تابع لائیں جس کے لئے مارچ 2021 سے ستمبر 2021 تک مہلت دی گئی تھی  جبکہ اس میں مزید چھ ماہ کا اضافہ کیا گیا تھا جس کی مدت اب 16 فروری کو ختم ہو رہی ہے۔

واضح رہے کہ سعودی وزارت تجارت و سرمایہ کاری نے ایسے تمام غیر ملکیوں کو خبردارکرتے ہوئے مہلت دی تھی کہ سعودی شہریوں کے نام پر کاروبار کرنا سنگین جرم ہے۔

دوسری جانب سعودی عرب میں مقیم پاکستانیوں کی بڑی تعداد نے اپنے کاروبار کو سعودی وزارت تجارت و سرمایہ کاری کی ہدایات کے مطابق رجسٹرڈ کروایا ہے جس میں سفارت خانہ پاکستان نے بھرپور معاونت فراہم کی ہے۔

اس حوالے سے ایمبیسی آف پاکستان میں منسٹر ٹریڈ اینڈ انویسٹمنٹ اظہر داہر کا کہنا ہے کہ سفارت خانہ پاکستان کے معاونت سے دو سو سے زائد پاکستانیوں نے اپنے کاروبار کو قانونی شکل دی ہے جبکہ اپنے طور پر بھی سینکڑوں افراد نے کاروبار کو رجسٹرڈ کروایا ہے۔

انہوں نے مزید کہا کہ ایسے وہ تمام پاکستانی جو سعودی شہریوں کے نام پر کاروبار کر رہے ہیں وہ اپنی کاروباری سرگرمیوں کو تحفظ دیں اور قانونی راستہ اختیار کریں۔