ترک صدر رجب طیب اردگان نے یوکرینی ہم منصب ولادیمیر زیلنسکی سے ٹیلی فونک رابطہ کیا ہے۔

بین الاقوامی خبر رساں ادارے کے مطابق ترک صدر نے اپنے یوکرینی  ہم منصب کو یقین دہانی کروائی ہے کہ ترکی روس اور یوکرین کےدرمیان فوری جنگ بندی کی کوششیں کررہا ہے۔

دو روز قبل روسی افواج کے یوکرین پر حملے کے فوراً بعد انقرہ میں یوکرین کے سفارت خانے نے ترکی سے مدد کی اپیل کی تھی۔

یہ بھی پڑھیں: ہتھیار نہیں ڈالیں گے، دفاع کریں گے، سڑک پر گھومتے یوکرائنی صدر کا ٹوئٹر پیغام

یوکرینی سفارت خانے  نے ٹوئیٹر پر جاری پیغام میں کہا تھا کہ روس نے یوکرین کے خلاف جنگ شروع کر رکھی ہے اور پرامن شہروں پر بمباری کی جا رہی ہے۔

سفارت خانے کی جانب سے مزید کہا گیا کہ ہم اپنے اسٹریٹجک پارٹنر ترکی اور اس کی عوام سے اس مشکل وقت میں ہمارا ساتھ دینے کا مطالبہ کرتے ہیں۔

یہ بھی پڑھیں: کیف، یوکرائنی اور روسی افواج میں دوبدو لڑائی، 3500 روسی فوجی مارنے کا دعویٰ

بعد ازاں  ترک صدر نے اپنے یوکرینی ہم منصب ولادیمیر زیلنسکی سے ٹیلیفونک رابطہ کیا اور یوکرین پر روس کے حملے کی مذمت کرتے ہوئے اسے  علاقائی امن اور استحکام کے لیے ایک بھاری دھچکا قرار دیا۔

واضح رہے کہ جنگ کے دوران اب تک سینکڑوں شہری ہلاک ہوچکے ہیں۔

دوسری جانب یوکرینی فوج نے  دعویٰ کیا ہے کہ اب تک ساڑھے 3 ہزار سے زائد روسی فوجی ہلاک اور 200 کے قریب قیدی بنائے جا چکے ہیں۔