ورلڈ میٹریالوجی آرگنائزیشن (ڈبلیو ایم او) کے مطابق امریکا میں چمکنے والی آسمانی بجلی کو تقریباً 500 میل (768 کلومیٹر) کے رداس تک دیکھا گیا ہے جو ایک نیا عالمی ریکارڈ ہے۔

لمبائی کے لحاظ سے ماضی میں کبھی بھی ایسی آسمانی بجلی نہیں دیکھی گئی ہے۔

اقوامِ متحدہ کا ادارہ، ورلڈ میٹریالوجی آرگنائزیشن موسمیاتی پیش گوئیوں کے علاوہ کُرہ ارض میں ہونے والی ارضیاتی تبدیلیوں اور موسموں پر تحقیق کے ساتھ ساتھ تمام اہم پہلوؤں کا ریکارڈ بھی مرتب کرتا ہے۔

ورلڈ میٹریالوجی آرگنائزیشن نے گزشتہ روز تصدیق کی ہے کہ 29 اپریل 2020ء کو امریکا کی تین جنوبی ریاستوں میں بڑے پیمانے پر چمکنے والی اس آسمانی بجلی کو ریکارڈ کیا گیا تھا۔

سیٹلائٹ کی مدد سے موصول ہونے والی تصاویر کے تجزیے کے بعد اس نئے عالمی ریکارڈ کا اعلان کیا گیا ہے۔ بتایا گیا ہے کہ آسمانی بجلی کے اس ایک ہی کوندے کی لمبائی 477.2 میل پر محیط تھی۔

اِس سے قبل آسمانی بجلی کی طویل ترین چمک کا ریکارڈ 2018ء میں برازیل میں ریکارڈ کیا گیا تھا۔ اِس بجلی کا لپکا 440.6 میل (709 کلومیٹر) تک دیکھا گیا تھا۔

آسمانی بجلی کے حوالے سے ایک اور ریکارڈ 2020ء میں یوروگوائے اور ارجنٹائن میں بھی بنا تھا جس میں آسمانی بجلی کا ایک ہی کوندا 17.1 سیکنڈ تک آنکھوں کو چندھیاتا رہا۔ اِس سے پیشتر طویل دورانیے تک آسمانی بجلی چمکنے کا عالمی ریکارڈ 16.7 سیکنڈ تھا۔

ورلڈ میٹریالوجی آرگنائزیشن سے وابستہ پروفیسر رینڈل کروینی نے بجلی چمکنے کے اس تازہ واقعے کو انتہائی غیر معمولی قرار دیتے ہوئے کہا ہے کہ اس کے تجزیے سے آسمانی بجلی کے حوالے سے نئے سائنسی حقائق سامنے آ سکیں گے۔

حالیہ برسوں کے دوران نت نئی ایجادات کے ساتھ ساتھ آسمانی بجلی کی لمبائی ماپنے کی ٹیکنالوجی میں بھی بہت زیادہ ترقی ہوئی ہے۔