یمن میں آئینی حکومت کی حمایت کرنے والے عرب عسکری اتحاد نے حوثی باغیوں کے متعدد حملوں کو پسپا کرنے کا دعویٰ کیا ہے۔

عرب اتحاد کی جانب سے سعودی عرب کے اہم شہر جدہ کی فضائی حدود میں حوثی باغیوں کے بھیجے گئے بمبار ڈرون کو روکنے اور اسے تباہ کرنے کی وڈیو شیئر کی گئی ہے۔

التحالف يؤكد اعتراض وتدمير هدف جوي معاد باتجاه مدينة جدة
#العربية pic.twitter.com/UGtEEwJZN7

— العربية (@AlArabiya) March 20, 2022

اس سے پہلے عرب اتحاد نے بتایا تھا کہ حوثی باغیوں کی جانب سے جدہ میں تیل کی تنصیبات آرامکو کے پیٹرولیم مصنوعات کے ڈسٹری بیوشن اسٹیشن کو نشانہ بنانے کی کوشش کی گئی تھی۔

عرب عسکری اتحاد کے ترجمان جنرل ترکی المالکی کا کہنا ہے کہ ایک حملے کے نتیجے میں تیل کے ایک ٹینک میں آگ لگ گئی تھی تاہم اس پر قابو پا لیا گیا۔ حملے میں کسی قسم کا جانی نقصان نہیں ہوا۔

اس سے قبل عرب اتحاد نے حدیدہ میں ایک بمبار کشتی کو تباہ کرنے اور بحیرہ احمر میں نیویگیشن کی آزادی کو نشانہ بنانے والے ایک حملے کو ناکام بنانے کی اطلاع دی تھی۔

یمن میں آئینی حکومت کی حمایت کرنے والے عرب اتحاد نے کہا ہے کہ سعودی فضائی افواج نے سعودی عرب میں جازان، خمیس مشیط، طائف، ینبع اور ظہران الجنوب کی طرف حوثی ملیشیا کے بھیجے گئے 9 بمبار ڈرون روک کر تباہ کر دیے ہیں۔

ترجمان عرب عسکری اتحاد نے ایک بیان میں کہا ہے کہ وہ خلیج تعاون کونسل کی سرپرستی میں یمن کے مختلف دھڑوں میں مذاکرات کامیاب بنانے کے لیے تحمل کا مظاہرہ کریں گے تاہم جواب دینے کا حق بھی محفوظ رکھتے ہیں۔

عرب اتحاد ترجمان نے کہا ہے کہ حوثی باغیوں کے حملے امن کی کوششوں کو سبوتاژ کرنے اور یمنی عوام کی مشکلات کو ختم کرنے کی راہ میں مزاحم ہیں جبکہ وہ یمن میں قیامِ امن کے لیے خلیج تعاون کونسل اور عالمی برادری کے مؤقف کی حمایت اور تنازع کے حل کے لیے مذاکرات کو موقع دینے کی کوشش کر رہا ہے۔