روسی فوج نے یوکرین کے ایٹمی پاور پلانٹ پر انٹرنیٹ اور موبائل نیٹ ورک بند کردیے۔

امریکی میڈیا کے مطابق انٹرنیشنل اٹامک انرجی ایجنسی (آئی اے ای اے) کے سربراہ کا کہنا ہےکہ روسی افواج   یوکرین کے ایٹمی پلانٹ میں مداخلت کررہی ہیں۔

 انٹرنیشنل اٹامک انرجی ایجنسی (آئی اے ای اے) کے سربراہ رافیل گروسی نے ایک بیان میں کہا کہ روسی فوج نے زاپورژیا کے ایٹمی پاور پلانٹ پر قبضہ کرلیا ہے۔

انہوں نے کہا کہ ہمارے پاس ایسی اطلاعات ہیں کہ یوکرین کے سب سےبڑے ایٹمی پاور پلانٹ پر موجود عملے کو وہاں کسی بھی آپریشن کے لیے روسی فوج کی اجازت درکار ہے حتیٰ کہ  دیکھ بھال کے کام کے لیے بھی روسی فوج کی اجازت ضروری قرار دی گئی ہے۔

رافیل گروسی کا کہنا  ہےکہ روسی فوج نے ایٹمی پاور پلانٹ پر موبائل نیٹ ورک اور انٹرنیٹ کو بھی بند کردیا ہے اور ضروری اطلاعات روکنے کے لیے عام حالات میں استعمال کیے جانے والے چینلز کو بھی بند کیا جارہا ہے ۔

انہوں نے بتایا کہ گزشتہ روز آئی اے ای اے کو اطلاعات موصول ہوئی تھیں کہ ایٹمی پاور پلانٹ پر فون لائنز، ای میل، فیکس کام نہیں کررہے جبکہ موبائل فون نیٹ ورک کی صورتحال  بھی انتہائی خراب ہے۔