چائنا ایسٹرن ایئرلائنز کے تباہ ہونے والے مسافر طیارے کے دوسرے بلیک باکس کی تلاش جاری ہے۔ حادثے کی وجہ کا ابھی تک تعین نہیں ہو سکا ہے۔

 برطانوی خبر رساں ایجنسی روئٹرز کے مطابق سول ایوی ایشن ایڈمنسٹریشن آف چائنا (سی اے اے سی) کے ایک اہلکار ژو تاؤ نے میڈیا کو بتایا کہ ابتدائی معلومات کے مطابق گزشتہ روز ملنے والا پہلا بلیک باکس کاک پٹ وائس ریکارڈر تھا۔

اہلکار نے بتایا کہ ریکارڈنگ محفوظ ہے اور اسے تجزیے کے لیے دارالحکومت بیجنگ بھیج دیا گیا ہے۔ کاک پٹ وائس ریکارڈر تفتیش کاروں کو طیارے کے تین پائلٹس کے درمیان ہونے والی گفتگو کی تفصیلات فراہم کرے گا۔

چینی حکام نے کہا کہ پائلٹس نے تیزی سے گرنے کے دوران ایئر ٹریفک کنٹرولرز کی بار بار کالز کا جواب نہیں دیا۔

سی اے اے سی کے عہدیدار ژو تاؤ نے پہلے بلیک باکس کے حوالے سے بتایا کہ ابتدائی معائنے سے معلوم ہوا ہے کہ ریکارڈر کے بیرونی حصے کو شدید نقصان پہنچا ہے تاہم اسٹوریج یونٹس نسبتاً مکمل ہیں۔

ژو نے کہا کہ بلیک باکس کو بیجنگ کے ایک انسٹیٹیوٹ کو ڈی کوڈنگ کے لیے بھیج دیا گیا ہے لیکن اس عمل میں کتنا وقت لگتا ہے اس کا انحصار نقصان کی حد پر ہوگا۔

چین حادثے کی تحقیقات کر رہا ہے تاہم امریکا کو بھی تحقیقات میں شامل ہونے کی دعوت دی گئی ہے کیونکہ طیارہ امریکی کمپنی کا ڈیزائن کردہ تھا۔

سی اے اے سی میں جہاز کی تحقیقاتی ٹیم کے سربراہ ماؤ یانفینگ نے کہا ہے کہ حادثے کی وجہ موسم نہیں تھا اور ایئر ٹریفک کنٹرولرز نے ٹیک آف کے بعد اور ہنگامی لینڈنگ سے پہلے پائلٹس سے رابطہ کیا تھا۔

واضح رہے کہ 21 مارچ، بروز پیر چین کی ایسٹرن ایئرلائنز کا بوئنگ 737 طیارہ جس میں 132 مسافر سوار تھے، پرواز کے تقریباً ایک گھنٹے بعد ووژو شہر کے قریب گوانگزی کے علاقے میں گر کر تباہ ہوگیا تھا۔