یوکرائن نے گزشتہ روز بیلا روس کی سرحد پر روس سے کیے گئے امن مذاکرات کی ناکامی کا اعلان کیا ہے۔

یوکرائن کے صدر ولودیمیر زیلنسکی نے گزشتہ روز یوکرائن کے ٹیلی ویژن پر نشر ہونے والے ایک خطاب میں کہا ہے کہ اُنہیں روس کے ساتھ امن مذاکرات سے کسی قسم کے مطلوبہ نتائج حاصل نہیں ہوئے ہیں۔

صدر زیلنسکی نے کہا کہ روس نے اپنا مؤقف واضح کر دیا ہے جبکہ ہم نے جنگ کے خاتمے کے لیے اپنی خواہشات کا ظہار کیا ہے اور ہمیں کچھ اشارے ملے ہیں۔

یوکرائنی صدر زیلنسکی نے کہا کہ مذاکراتی وفد کی کیف واپسی کے بعد ہم مذاکرات کے اگلے دور کے بارے میں فیصلہ کریں گے۔

یوکرائنی صدر نے کہا کہ مذاکرات کے دوران بھی روس نے حملے جاری رکھے جس سے ہمارا یقین اور پختہ ہو گیا ہے کہ روس صرف دباؤ بڑھانے کے حربے استعمال کر رہا ہے لیکن روس اپنا وقت ضائع نہ کرے کیونکہ ہم اس طرح کے حربوں کو نہیں مانتے۔

یوکرائن کے حکام کے مطابق اتوار کو شمال مشرقی شہر اوختیرکا پر کی گئی روسی گولہ باری کے نتیجے میں 70 یوکرائنی فوجی ہلاک ہو گئے ہیں۔

سومی کی ریاستی انتظامیہ کے سربراہ دیمیترو زیویتسکی کا کہنا ہے کہ روسی حملے میں یوکرائن کا ایک فوجی یونٹ تباہ ہو گیا ہے، امدادی کارکن اور رضاکار ملبے سے لاشوں کو نکال رہے ہیں۔