دنیا میں کہیں بھی ہونے والے جہاز حادثے کے بعد خبروں میں سب سے زیادہ تذکرہ بلیک باکس کا ہوتا ہے۔

ریسکیو حکام حادثے کے مقام پر زخمیوں اور لاشوں کی تلاش کے بعد جو سب سے پہلا کام کرتے ہیں وہ بلیک باکس کی تلاش ہوتا ہے۔

بلیک باکس کیا ہے اور کسی بھی جہاز حادثے میں یہ اہمیت کا حامل کیوں ہوتا ہے ، آیئے اس بارے میں آپ کو مختصراً بتاتے ہیں۔

بلیک باکس جہاز میں لگا ایک فلائیٹ ریکارڈر ہوتا ہے جو جہازوں میں دوران پرواز ہونے والی معلومات اکھٹا کرنے کے لیے لگا یا جاتا ہے۔

بلیک باکس میں موجود وائس ریکارڈرمیں کاک پٹ میں دوران پرواز ہونے والی گفتگو، ریڈیو نشریات سمیت انجن کا شور بھی اس میں ریکارڈ ہوتا ہے۔

بلیک باکس میں فلائٹ ڈیٹا ریکارڈر نامی ایک چھوٹا کمپیوٹر موجود ہوتا ہے جس سے پرواز کی رفتار، پوزیشن اور اونچائی کے بارے میں معلومات حاصل ہوتی ہیں۔

کسی واقعے یا حادثے کی صورت میں اس سے ملنے والی اہم تکنیکی معلومات حادثے کی تفتیش میں مددگار ثابت ہوتی ہے جس سے اصل مسئلے کا تعین کیا جاتا ہے۔

بلیک باکس کی بناوٹ کچھ ایسی ہوتی ہے کہ اسے انتہائی گرمی، سردی، آگ اور پانی سے بھی نقصان نہیں پہنچتا اور اس میں ایک ٹرانسمیٹر لگا ہوتا ہے جو کسی حادثے کی صورت میں اسے ڈھونڈنے میں مدد فراہم کرتا ہے۔

بلیک باکس اگر پانی میں ہو تب بھی اس میں لگے ٹرانسمیٹر سے 30 دن تک سگنلز آتے رہتے ہیں۔

بلیک باکس کو محفوظ رکھنے  کے لیے طیارے کے پچھلے حصے میں نصب کیا جاتا ہے کیونکہ حادثے کی صورت میں طیارے کا پچھلا حصہ عموماً محفوظ رہتا ہے۔