بھارت کی 5 ریاستوں میں ہونے والے عام انتخابات میں ہندو انتہا پسند جماعت بی جے پی نے مسلم دشمن بیانیے کے ساتھ بھرپور کامیابی حاصل کرلی ہے۔

بھارت کی 5 ریاستوں اتر پردیش، اتراکھنڈ، پنجاب، گوا اور منی پور کی اسمبلیوں کے لیے مختلف مراحل میں انتخابات ہوئے، جن کے نتائج کا اعلان کردیا گیا ہے۔

ابتدائی نتائج کے مطابق بی جے پی مسلم دشمن انتخابی حکمت عملی ایک مرتبہ پھر کامیاب ہوگئی ہے۔

بی جے پی 5 میں سے 4 ریاستوں میں اقتدار اپنے نام کرنے میں کامیاب ہوگئی ہے۔

اتر پردیش؛

بھارت کی سب سے بڑی ریاست اتر پردیش ہے، جہاں اس بار ریاستی اسمبلی کے لیے الیکشن کئی مراحل میں مکمل کئے گئے۔

ابتدائی نتائج کے مطابق اتر پردیش میں بی جے پی دوبارہ کامیاب ہوگئی ہے۔

اتر پردیش اسمبلی کی 403 نشستوں میں سے بی جے پی 260 میں یا تو جیت چکی ہے یا اسے فیصلہ کن برتری حاصل ہے۔

2022 کے انتخابات میں بی جے پی کو گزشتہ انتخابات کے مقابلے میں 62 نشستیں کم ملنے کا امکان ہے۔

ریاستی اسمبلی میں سماج وادی پارٹی 137 نشستوں کے ساتھ دوسرے نمبر پر ہے جب کہ کانگریس کو صرف 2 ہی نشستیں ملی ہیں۔

گوا؛

گوا اسمبلی کی 40 نشستوں میں بی جے پی 20 نشستوں کے ساتھ سب سے بڑی پارٹی بن کر ابھری ہے۔

اس کے علاوہ کانگریس نے 11، ایم جی پی اور عام آدمی پارٹی نے 2،2 اور گوا فارورڈ پارٹی ایک نشست حاصل کی ہے۔

پنجاب سے بھی کانگریس کا صفایا؛

پنجاب میں کانگریس اور بی جے پی کامیاب نہیں ہوسکی ، اس ریاست میں عام آدمی پارٹی نے اپنے تمام حریفوں کو پیچھے چھوڑ دیا ہے۔

پنجاب اسمبلی کی 117 نشستوں میں سے 92 پر عام آدمی پارٹی کے امیدوار کامیاب یا فیصلہ کن برتری حاصل کئے ہوئے ہیں۔

اس کے علاوہ کانگریس کو 18، شرومنی اکالی دل کو 3، بی جے پی کو 2، پنجاب لوک کانگریس کو ایک نشست ملی ہے۔

اتر اکھنڈ:

بھارتی ریاست اتر اکھنڈ کی 70 رکنی اسمبلی میں بی جے پی 48 ارکان کے ساتھ پہلے نمبر ہے۔ کانگریس پارٹی 17 نشستوں کے ساتھ دوسرے نمبر پر رہی جب کہ دیگر جماعتوں نے 4 نشستیں حاصل کی ہیں۔

منی پور میں بھی بی جے پی کامیاب؛

بھارت کی مشرقی ریاست منی پور کی اسمبلی 55 نشستوں پر مشتمل ہے، ریاستی انتخابات میں بی جے پی نے 27، نیشنل پیپلز پارٹی نے 7، کانگریس نے 6، ناگا پیپلز فرنٹ نے 4 جب کہ دیگر جماعتوں نے 11 نشستیں حاصل کی ہیں۔