فرانس نے کورونا کے پھیلاؤ کو روکنے کے لیے ملک میں نافذ کردہ زیادہ تر پابندیاں ختم کر دی ہیں۔

اب فرانس میں عوام کو اکثر مقامات پر ماسک پہننے کی ضرورت نہیں رہی جبکہ غیر ویکسینیشن شدہ لوگ اب ریسٹورنٹس، اسٹیڈیمز اور دیگر جگہوں پر بھی جا سکیں گے۔

فرانس میں پابندیوں کے خاتمے کا فیصلہ رواں ماہ کے آغاز میں کیا گیا تھا کیونکہ فرانسیسی صدارتی انتخابات کے پہلے مرحلے کے انعقاد میں ایک ماہ سے بھی کم وقت باقی رہ گیا ہے۔ صدارتی انتخابات کا پہلا مرحلہ 10 اپریل سے شروع ہورہا ہے۔

برطانیہ نے بھی مسافروں کے لیے کورونا وائرس سے متعلق تمام حفاظتی اقدامات جمعہ تک ختم کرنے کا اعلان کیا ہے تاکہ ایسٹر کی چھٹیوں کے دوران عوام کے لیے سفر کو آسان بنایا جائے۔

خبر رساں ادارے ایسوسی ایٹڈ پریس کے مطابق اب برطانیہ میں غیر ویکسینیشن شدہ افراد کو سفر سے پہلے کورونا ٹیسٹ نہیں کرانا پڑے گا اور نہ ہی مسافروں کو لوکیٹر فارم جمع کرانے کی ضرورت ہوگی۔ لوکیٹر فارم میں مسافروں کو سفری معلومات کے علاوہ برطانیہ میں اپنا رہائشی ایڈریس بھی دینا پڑتا تھا۔

برطانوی حکومت کی جانب سے یہ اعلان ایسے موقع پر کیا گیا ہے جب ملک کے چاروں حصوں انگلینڈ، اسکاٹ لینڈ، ویلز اور شمالی آئرلینڈ میں جنوری کے بعد پہلی مرتبہ کورونا کیسز میں اضافہ ہو رہا ہے۔

گزشتہ روز جاری ہونے والے سرکاری اعداد و شمار کے مطابق گزشتہ ہفتے 4 لاکھ 44 ہزار نئے کورونا کیسز ریکارڈ کیے گئے ہیں جو پچھلے ہفتے کے مقابلے میں 48 فیصد زیادہ ہیں۔

ہسپتالوں میں بھی کورونا وائرس کے مریضوں کی تعداد میں اضافہ دیکھنے میں آیا ہے تاہم جنوری کے مقابلے میں یہ تعداد کم ہے۔

برطانوی وزیر صحت ساجد جاوید کا کہنا ہے کہ تمام کورونا پابندیوں کے خاتمے کے بعد متاثرین کی تعداد میں مزید اضافہ متوقع ہے تاہم کورونا کی نئی اقسام کو مانیٹر کرتے رہیں گے۔