جنگی جنون میں مبتلا بھارت دنیا بھر میں ایک بار پھر فوجی سازو سامان خریدنے والے ممالک کی فہرست میں سرفہرست آگیا ہے۔

کشمیر میڈیا سروس کی رپورٹ کے مطابق جنگی جنون میں مبتلا بھارت نے مصر، سعودی عرب، آسٹریلیا اور چین سے بھی زیادہ ہتھیار خریدے ہیں۔

رپورٹ کے مطابق سویڈن میں قائم تھنک ٹینک اسٹاک ہوم انٹرنیشنل پیس ریسرچ انسٹی ٹیوٹ نے 2017 سے 2021 کے دوران ہتھیاروں کی خرید و فروخت کے بارے میں آج رپورٹ جاری کی ہے جس کو بین الاقوامی ہتھیاروں کی منتقلی کے رجحانات 2021 کا نام دیا گیا ہے۔

تھنک ٹینک اسٹاک ہوم انٹرنیشنل پیس ریسرچ انسٹی ٹیوٹ کی رپورٹ کے اعدادوشمار کے مطابق امریکہ، روس اور فرانس ہتھیار بر آمد کرنے والے بڑے ممالک ہیں۔

رپورٹ کے مطابق امریکہ 39 فیصد، روس 19 فیصد اور فرانس 11 برآمد کرنے والے سب سے بڑے ممالک ہیں جبکہ بھارت 11 فیصد ہتھیار درآمد کرنے والا دنیا کا سب سے بڑا ملک بن کرسامنے آیا ہے۔

رپورٹ میں کہا گیا ہے کہ بھارت گذشتہ پانچ برس کے دوران ہتھیاروں کی خریداری میں 21 فیصد کمی کے باوجود دنیا میں ہتھیار درآمد کرنے والا سب سے بڑا ملک ہے۔

اس عرصے کے دوران دنیا بھر میں ہتھیاروں کی مجموعی درآمدات میں بھارت کا حصہ 11 فیصد تھا۔ روس 2012-16اور 2017-21 تک بھارت کو ہتھیار اور جنگی سازو سامان فراہم کرنے والا سب سے بڑا ملک تھا۔