خلیج تعاون کونسل کے زیر اہتمام سعودی عرب کے دارالحکومت ریاض میں یمن تنازع کے حل کے لیے مشاورتی اجلاس چھٹے روز بھی جاری رہا۔

ریاض میں یمنی فریقین کے درمیان مشاورت میں شریک سیاست دانوں نے سیاسی، عسکری، سکیورٹی اور اقتصادی امور پر بات چیت میں اہم پیش رفت کا عندیہ ظاہر کیا ہے۔

ایک رہنما نے العربیہ اور الحدث چینلز کو بتایا ہے کہ منی ورکنگ گروپس نے یمن کو سیاسی طور پر درپیش چیلنجز پر بات چیت کی۔ خاص طور پر حوثی ملیشیا کی مداخلت اور اس کی جانب سے قیامِ امن کی کوششوں میں رکاوٹ کے حوالے سے فریقین کے نظریات اور خیالات میں قربت پیدا کرنے اور اختلافات کو کم کرنے پر تبادلہ خیال کیا۔

اجلاسوں میں عدم توازن اور بدعنوانی کے محور کی نشاندہی کرتے ہوئے سکیورٹی، عسکری اور اقتصادی صورتحال کی تشخیص پر بھی تبادلہ خیال کیا گیا۔

اجلاس کا مقصد انسانی ہمدردی، سماجی اور میڈیا چیلنجز پر بات کرنے کے علاوہ ان مسائل کو ترجیح دینا ہے جن کے فوری حل کی ضرورت ہے۔

یہ پیش رفت ایک ایسے وقت میں سامنے آئی ہے جب یمنی فوج کے ترجمان بریگیڈیئر جنرل عبدہ مجالی نے انکشاف کیا ہے کہ حوثی ملیشیا نے مارب، تعز اور حدیدہ کے محاذوں پر متعدد خلاف ورزیاں کی ہیں۔

یمنی فوج کے ترجمان کا کہنا تھا کہ حوثی ملیشیا کی طرف سے اقوام متحدہ کے اعلان کردہ جنگ بندی کی پاسداری نہیں کی جا رہی۔

یمنی فوج کے ترجمان نے اس خبر کی تصدیق بھی کی ہے جو اخبار الشرق الاوسط کی طرف سے رپورٹ کی گئی تھی۔ خبر کے مطابق حوثی ملیشیا نے جنگ بندی کے معاہدوں کی خلاف ورزی کی ہے اور یمنی فوج نے حوثی باغیوں کی متعدد کارروائیوں کو ناکام بنا دیا ہے۔