یوکرین میں ریلوے اسٹیشن پر دو راکٹ حملوں میں ہلاکتوں کی تعداد 50 ہوگئی اور زخمیوں کی تعداد 100 سے بھی زائد ہے جب کہ ہلاکتوں میں اضافے کا خدشہ ظاہر کیا جارہا ہے۔ 

بین الاقوامی خبر رساں ادارے کے مطابق  یوکرین میں اس ریلوے اسٹیشن پر 2 راکٹ حملے ہوئے ہیں جس اسٹیشن کو شہریوں کے انخلاء  کے لیے استعمال کیا جاتا تھا جس کے نتیجے میں ہلاک  ہونے والے افراد کی تعداد 50 ہوگئی جب کہ زخمیوں کی تعداد 100 سے تجاویز کرگئی۔

گورنر پاولو کیریلینکو کے مطابق ٹرین اسٹیشن حملے میں ابتدائی طور پر 30 افراد ہلاک ہوئے تھے جس کے بعد زخمیوں کو فوری طور پر اسپتال منتقل کیا گیا جہاں 20 مزید افراد دم توڑ گئے جب کہ ہلاکتوں میں اضافے کا خدشہ ظاہر کیا جارہا ہے۔

خیال رہے ٹرین اسٹیشن پر حملہ اس وقت ہوا جب مشرقی حصے سے لوگوں کے انخلا کے لئےٹرین اسٹیشن پر موجود تھے۔

سرکاری ریلوے کمپنی کے ترجمان نے بھی ہلاکتوں کی تصدیق کرتے ہوئے کہا کہ مشرقی یوکرین میں ایک ریلوے اسٹیشن پر روسی راکٹ حملے میں 50 سے ​​زائد افراد ہلاک اور 100 سے زائد زخمی ہوئے ہیں۔

ترجمان کا مزید کہنا ہے کہ راکٹ حملہ ایسے وقت میں ہوا  جب شہری ملک کے دیگر محفوظ حصوں کی طرف نقل مکانی کی کوششوں میں مصروف تھے۔

دوسری جانب روس نے فوری طور پر حملے کی اطلاعات اور ہلاکتوں کی تعداد پر کوئی تبصرہ نہیں کیا ہے۔

واضح رہے کہ روس نے 24 فروری کو یوکرین پر حملے کے بعد سے شہریوں کو نشانہ بنانے کی تردید کی ہے۔