امریکا نے اعلان کیا ہے کہ وہ جلد ہی سلوواکیہ میں امریکی فضائی دفاعی نظام پیٹریاٹ نصب کرے گا۔

امریکی وزیر دفاع لائیڈ آسٹن کا کہنا ہے کہ سلوواکیہ کی جانب سے یوکرین کو اپنا واحد فضائی دفاعی نظام ایس ۔ 300 دینے کے بعد امریکا نے یورپ میں تعینات اپنے پیٹریاٹ ایئر ڈیفنس سسٹم میں سے ایک کو سلوواکیہ میں نصب کرنے کا حکم دیا ہے۔

امریکی وزیر دفاع لائیڈ آسٹن نے کہا کہ وہ یوکرین کو ایک اہم فضائی دفاعی صلاحیت کے ساتھ ایس ۔ 300 فضائی دفاعی نظام دینے پر سلواکیہ حکومت کی سخاوت کی تعریف کرتے ہیں۔

اس بات کی طرف اشارہ کرتے ہوئے کہ سلوواکیہ ہزاروں یوکرینی مہاجرین کی میزبانی بھی کررہا ہے، امریکی وزیر دفاع لائیڈ آسٹن نے کہا کہ یوکرین کی ضروریات کو پورا کرنے کے لیے امریکا اپنے شراکت داروں اور اتحادیوں کے ساتھ تعاون اور ہم آہنگی کا سلسلہ جاری رکھے گا۔

امریکی وزیر دفاع لائیڈ آسٹن نے مزید کہا کہ سلوواکیہ کی دعوت پر اور اُن کی ہدایت پر امریکی یورپی کمانڈ سلواکیہ میں پیٹریاٹ میزائل ڈیفنس سسٹم نصب کرے گی جس کی کمانڈ امریکی فوجی کریں گے۔

امریکی وزیر دفاع لائیڈ آسٹن کے مطابق مستقل فضائی دفاعی حل پر سلوواکیہ حکومت سے مشاورت کے لیے پیٹریاٹ ڈیفنس سسٹم کی تعیناتی کا وقت فی الحال طے نہیں ہوا ہے۔

واضح رہے کہ جنگ زدہ ملک یوکرین کے صدر ولودیمیر زیلنسکی نے حال ہی میں ایک بار پھر یورپی ممالک اور امریکا سے روس کے خلاف مزید سخت پابندیوں اور اسلحے کی فراہمی کا مطالبہ کیا تھا۔