القاعدہ کے سربراہ ایمن الظواہری کی نئی وڈیو منظرعام پر آئی ہے جس میں انہوں نے یوکرین پر روسی حملے کا ذ‌ٓمہ دار امریکا کو ٹھہرایا ہے۔

یہ وڈیو القاعدہ کے بانی اور پہلے سربراہ اسامہ بن لادن کی گیارہویں برسی کے موقع پر جاری کی گئی ہے۔ ایمن الظواہری کی وڈیو کا دورانیہ 27 منٹ ہے اور اسے بروز جمعہ چھ اپریل کو جاری کیا گیا تھا۔

ایمن الظواہری کی اس حالیہ وڈیو کے بارے میں بنیادی معلومات سائٹ انٹیلیجنس گروپ کی جانب سے فراہم کی گئی ہیں جو دنیا بھر میں انتہا پسندوں کی سرگرمیوں کی نگرانی کرتا ہے۔

واضح رہے کہ اسامہ بن لادن کو امریکا میں نائن الیون دہشت گرد حملوں کا ماسٹر مائنڈ قرار دیا جاتا ہے۔ بن لادن کو 2011ء میں امریکی فوج نے پاکستان میں ان کے خفیہ ٹھکانے میں ایک آپریشن کے دوران ہلاک کر دیا تھا۔

اس وڈیو میں ایمن الظواہری ایک ڈیسک کے پیچھے بیٹھے ہیں اور ان کے پیچھے کتابیں ہیں اور پہلو میں ایک بندوق رکھی ہوئی ہے۔

وڈیو میں ان کا کہنا ہے کہ یوکرین میں روسی فوج کشی کی ذمہ دار امریکی کمزوریاں ہیں، مسلمان ذمہ داری کا احساس کریں کیونکہ اس وقت امریکا، عراق اور افغانستان کی جنگوں کے بعد کمزور پڑ چکا ہے۔

الظواہری نے اپنے وڈیو پیغام میں مزید کہا کہ امریکا کو عراق اور افغانستان میں شکست کے بعد کورونا وبا کے باعث اقتصادی بدحالی کا سامنا ہے اور ایسے میں اس نے اپنے اتحادی ملک یوکرین کو تنہا چھوڑ دیا۔

خیال رہے کہ القاعدہ کے سربراہ ایمن الظواہری امریکی ادارے ایف بی آئی کی انتہائی مطلوب افراد کی فہرست میں شامل ہیں تاہم وہ کہاں روپوش ہیں اس حوالے سے کوئی معلومات دستیاب نہیں۔ امریکا نے ان کی گرفتاری یا ٹھکانے کی اطلاع دینے والے کے لیے 25 ملین ڈالر کا انعام مقرر کر رکھا ہے۔