انسانی حقوق کی عالمی تنظیم ایمنسٹی انٹرنیشنل نے بھارت میں صحافیوں اور انسانی حقوق کے کارکنوں کو ہراساں کرنے کی مذمت کی ہے۔

غیر ملکی خبر رساں ادارے کے مطابق بھارتی صحافی محمد زبیر کو دہلی پولیس نے پیر کی رات ان کی سوشل میڈیا پوسٹ پر گرفتار کیا تھا۔

بھارت میں ایمنسٹی انٹرنیشنل کے سربراہ آکار پٹیل نے ایک بیان میں کہا کہ بھارتی حکام محمد زبیر کو جعلی خبروں اور غلط معلومات کا توڑ کرنے اور اقلیتوں کے خلاف امتیازی سلوک کو روکنے کے لیے ان کے کام کے لیے نشانہ بنا رہے ہیں۔

انہوں نے کہا کہ محمد زبیر کی گرفتاری سے ظاہر ہوتا ہے کہ بھارت میں انسانی حقوق کے کارکنوں کو درپیش خطرہ بحرانی موڑ پر پہنچ گیا ہے۔
آکار پٹیل نے کہا کہ حقیقت یہ ہے کہ محمد زیبر کو فرسٹ انفارمیشن رپورٹ (ایف آئی آر) کی کاپی فراہم نہیں کی گئی تھی اور عجلت میں کئی گئی ان کی گرفتاری سے ظاہر ہوتا ہے کہ بھارتی حکام کتنی ڈھٹائی کا شکار ہوچکے ہیں۔

انہوں نے کہا کہ ہراساں کرنا، ڈرانادھمکانا، بلاجواز گرفتاریاں، اور انسانی حقوق کے کارکنوں کو سچ اور انصاف کی تلاش کی پاداش میں قید کرنا بھارت میں خطرناک حد تک معمول بن گیا ہے۔

آکار پٹیل نے دہلی پولیس سے زبیر کو فوری طور پر اور غیر مشروط طور پر رہا کرنے اور صحافیوں، انسانی حقوق کے محافظوں اور کارکنوں کے کو ہراساں کرنے کی کارروئیاں کو ختم کرنے کا مطالبہ کیا ہے۔

انہوں نے مزید کہا کہ حکام کی طرف سے طاقت کا استعمال اس بات کا غماز ہے کہ بھارت میں اختلاف رائے کو برداشت نہیں کیا جا رہا۔