روس نے جرمنی کو تنبیہ کی ہے کہ نارتھ اسٹریم پائپ لائن کے ذریعے اسے روسی گیس کی سپلائی اس پائپ لائن کی مرمت کی مجوزہ مدت کے بعد تک بھی بند رہ سکتی ہے۔ جرمنی بھی جانتا ہے کہ اسے روسی گیس کی ترسیل مستقل طور پر روکی جا سکتی ہے۔

جرمن حکومت جانتی ہے کہ روس کے اس پیغام اور تنبیہ کے درپردہ کیا محرکات ہو سکتے ہیں اسی لیے اُس نے بھی خبردار کر دیا ہے کہ ممکنہ طور پر روس جرمنی کو گیس کی فراہمی مستقل طور پر بند کر سکتا ہے۔ اس کی وجہ 24 فروری سے جاری روس یوکرین جنگ ہے جس کے باعث یورپ میں جرمنی سمیت یورپی یونین کے تمام رکن ملک روس کے خلاف کئی طرح کی پابندیاں لگا چکے ہیں۔

روس سے شمالی جرمنی کے راستے یورپ کو قدرتی گیس کی ترسیل اس پائپ لائن کی طے شدہ معمول کے مطابق مرمت کے باعث روکی گئی ہے جو عام طور پر تقریباً 10 دن جاری رہتی ہے لیکن روس کی طرف سے اس پائپ لائن کی دیکھ بھال اور مرمت کا کام ماضی میں بھی کئی مرتبہ ٹائم ٹیبل کے مطابق نہیں کیا گیا۔

ان تجربات کو سامنے رکھتے ہوئے جرمن وزیر اقتصادیات رابرٹ ہابیک نے خبردار کیا ہے کہ اس دیکھ بھال اور اس کے دورانیے کے طویل ہو جانے کو بہانہ بنا کر روس جرمنی اور یورپ کو گیس کی سپلائی زیادہ عرصے تک بند کر سکتا ہے اور ایسے کسی بھی اقدام کا مقصد یورپ کو عدم استحکام کا شکار کرنا ہوگا۔

یورپی یونین کے بہت سے ممالک اپنی توانائی کی ضروریات کو پورا کرنے کے لیے روس سے درآمد شدہ قدرتی گیس پر انحصار کرتے ہیں۔ یوکرین پر روسی حملے کے بعد سے یورپی یونین کا سب سے زیادہ آبادی والا ملک اور اس بلاک کی سب سے بڑی معیشت جرمنی روس سے درآمدی گیس کی ترسیل پر انحصار کم کرکے 55 فیصد سے 35 فیصد پر لا چکی ہے۔