سعودی عرب نے تمام طیاروں کے لیے اپنی فضائی حدود کھول دی ہیں جس کے بعد اسرائیلی طیارے بھی سعودی عرب کی فضائی حدود سے گزرسکیں گے۔

غیر ملکی خبر رساں ادارے کے مطابق سعودی سول ایوی ایشن اتھارٹی کا کہنا ہے کہ سعودی عرب نے مملکت کی فضائی حدود کو ان تمام طیاروں کے لیے کھولنے کا فیصلہ کیا ہے جو اس کے اوپر سے پرواز کرنے کی ضرورتیں پوری کرتے ہیں۔

سول ایوی ایشن اتھارٹی کا بیان میں کہنا تھا کہ یہ فیصلہ تین بر اعظموں کو جوڑنے والے ایک عالمی مرکز کے طور پر کیا گیا ہے جو مملکت کی پوزیشن کو مضبوط کرنے کی کوششوں کا حصہ ہے۔

دوسری جانب امریکہ نے اس فیصلے کی تعریف کی ہے جبکہ امریکی صدر جوبائیڈن اس تاریخی فیصلے کا بھی خیر مقدم کیا ہے۔

امریکی قومی سلامتی کے مشیر جیک سولیوان کا اپنے ایک بیان میں کہنا تھا کہ امریکی صدر نے اس فیصلے کی تعریف کی ہے، یہ فیصلہ صدر کی سعودی عرب کے ساتھ مہینوں کی مسلسل اور اصولی سفارت کاری کا نتیجہ ہے۔

جیک سولیوان نے کہا کہ امریکی صدر جمعہ کے روز مشرق وسطی کے دورے کے دوران سعودی عرب پہنچ رہے ہیں جو اس پیش رفت پر اپنے خیالات کا بھی اظہار کریں گے۔

واضح رہے کہ بدھ کے روز امریکی صدر کا مشرق وسطیٰ کا دورہ شروع کرنے سے قبل واشنگٹن نے اشارہ دیا تھا کہ مزید عرب ممالک بھی اسرائیل کے ساتھ اپنے تعلقات بڑھانے کی کوشش کرسکتے ہیں۔

اس بیان کے بعد قیاس آرائیاں شروع ہوگئی تھی کہ آیا سعودی عرب اپنے اس دیرینہ موقف سے پیچھے یٹ جائے گا کہ اسرائیل کے ساتھ جب تک تعلقات قائم نہیں ہوں گے جب تک کہ مسئلہ فلسطین حل نہ ہوجائے۔

یاد رہے کہ سن 2020 میں اسرائیل کے متحدہ عرب امارات، بحرین اور مراکش سے تعلقات قائم کرنے کی سعودی عرب نے مخالت نہیں کی تھی۔

تجزیہ کاروں کا خیال ہے کہ فوری طورکسی اہم پیش رفت کا امکان نہیں اور ریاض غالباً باضابطہ تعلقات قائم کرنے پر رضامند نہیں ہوگا۔