حجاج کرام مزدلفہ میں کھلے آسمان تلے رات گزارنے کے بعد رمی جمرات کیلئے منٰی پہنچ گئے ہیں۔

لاکھوں حجاج کرام حج کا رکن اعظم وقوف عرفہ ادا کرنے کے بعد گزشتہ رات مزدلفہ پہنچے تھے۔

حج کی سعادت حاصل کرنے والے افراد آج قربانی کر کے سر منڈوائیں گے، احرام کھول دیں گے اور طواف زیارت کریں گے۔

حجاج کرام صفا اور مروہ کے درمیان عام لباس میں سعی کریں گے اور منیٰ واپس جائیں گے۔

واضح رہے کہ اس سال دنیا بھر سے 10 لاکھ اور پاکستان سے تقریباً 80 ہزار عازمین ِحج میدانِ عرفات میں عبادت میں مصروف رہے۔

یاد رہے کہ گزشتہ روز میدانِ عرفات میں مسجدِ نمرہ میں محمد شیخ بن عبدالکریم نے خطبۂ حج میں کہا تھا کہ ایک مسلمان کا دوسرے مسلمان پر حق یہ ہے کہ اس کا خون اس پر حرام ہے، اس کی عزت و حرمت اس پر حرام ہے لہٰذا ایک مسلمان دوسرے مسلمان کے ساتھ انتہائی اعلیٰ اخلاق کے ساتھ پیش آئے اور کسی کے ساتھ ایسا رویہ اختیار نہ کرے جس سے آپس میں رنجشیں اور چپقلش پیدا ہو۔

A summary of Arafah sermon, which was delivered by his excellency sheikh Muhammad Al-Issa. It implied meanings of kindness, compassion, and following the Prohet’s sunnah (PBUH).
pic.twitter.com/pnxI4Uzirh

— Haramain Sharifain (@hsharifain) July 8, 2022

 خطبہ حج دیتے ہوئے ان کا کہنا تھا کہ اللّٰہ تعالیٰ سے ڈرنے میں ہی کامیابی ہے،جو چیز نفرت کا باعث بنے اس سے دور ہو جائیں، آپ کی مصیبت اللّٰہ کے سوا اور کوئی دور نہیں کر سکتا۔

خیال رہے کہ سعودی عرب سمیت دنیا کے مختلف ممالک میں آج عید الاضحیٰ مذہبی عقیدت و احترام کے ساتھ منائی جارہی ہے۔

دوسری جانب برطانیہ، امریکہ اور کینیڈا میں مسلمان کمیونٹی تقسیم دکھائی دی جس کے باعث بعض افراد آج اور بعض افراد کل عید الاضحیٰ منائیں گے۔