حریت رہنما عبدالحمید لون نے کہا ہے کہ مقبوضہ جموں کشمیر کی عوام کے حق پر شب خون مارا گیا ہے۔

کشمیری قوم آج کا دن یوم الحاق پاکستان کے  طور پر منارہے ہیں اس موقع پر عبدالحمید لون نے جاری کردہ پیغام میں کہا کہ آج ہی کے دن 19 جولائی 1947 میں سری نگر میں الحاق پاکستان کی قرارداد منظور کی گئی تھی ۔

انہوں نے کہا کہ مقبوضہ کشمیر کی اسمبلی (پریجا پرہشد) نے سری نگر میں سردار ابرہیم خان کی رہائش پر قرار داد منظور کی تھی، مسلم کانفرنس کے رہنماؤں نے قرارداد الحاق پاکستان پیش کی تھی ۔

حریت رہنما نے کہا کہ اس قرار داد میں کشمیری عوام نے مستقبل کے پاکستان کے ساتھ اپنے آپ کو وابستہ کیا تھا لیکن بھارت اور برطانوی سامراج نے سازش کے ذریعے مسلم اکثریتی ریاست کو غیر قانونی طور پر بھارت کی جھولی میں ڈال دیا۔

رہنما عبدالحمید لون نے کہا کہ کشمیری عوام آج بھی اپنے حق، حق خود ارادیت کی جدوجہد میں اپنی جانوں کا نذرانہ پیش کر رہے ہیں لیکن اقوام متحدہ مسلہ کشمیر کو حل کرنے میں ناکام رہا۔

حریت رہنما عبدالحمید لون کا مزید کہنا تھا کہ حق خود ارادیت کی جدوجہد میں چھ لاکھ سے زائد کشمیریوں کو بھارتی قابض افواج نے شہید کردیا۔