سری نگر:کشمیری عوام آج بھی وحشیانہ بھارتی فوج کے قبضے میں عید منانے پر مجبور ہیں۔

کشمیر میڈیا سروس کی رپورٹ کے مطابق بھارت کے غیر قانونی زیر قبضہ جموں وکشمیر میں محکوم کشمیری مسلمان وحشیانہ بھارتی فوجی قبضے میں ایک اور عیدالاضحی منا رہے ہیں۔

رپورٹ میں کہا گیا ہے کہ جب دنیا بھر میں مسلمان عیدالاضحیٰ منا رہے ہیں تو کشمیری عوام بھارت کے قبضے میں مسلسل مشکلات کا شکار ہیں۔

رپورٹ میں افسوس کا اظہار کیا گیا کہ کشمیری گذشتہ سات دہائیوں سے بھارتی بندوقوں کے سائے میں عید منا رہے ہیں۔

رپورٹ میں کہا گیا ہے کہ قابض بھارتی فورسز کی طرف سے مقبوضہ علاقے میں محاصرے اور تلاشی کی نام نہاد کارروائیوں کے دوران بے گناہ شہریوں کا قتل، گرفتاری، تشدد اور املاک کی توڑ پھوڑ روز کا معمول ہیں لہذا اس مشکل صورتحال میں کشمیری مسلمان کیسے عید کی خوشیاں مناسکتے ہیں۔

دوسری جانب پاکستان سمیت ایشیائی ممالک آج مذہبی جوش و خروش کے ساتھ عید الاضحیٰ منارہے ہیں جبکہ سعودی عرب اور خلیجی ممالک سمیت یورپ، امریکہ اور برطانیہ میں گذشتہ روز عید الاضحیٰ منائی گئی۔

واضح رہے کہ مقبوضہ کشمیر میں بھی آج عیدالاضحی منائی جارہی ہے تاہم نریندر مودی کی فسطائی بھارتی حکومت کی طرف سے علاقے میں نافذ پابندیوں اور قابض فورسز کے محاصروں اور چھاپوں کی وجہ سے اس خوشیوں بھرے دن کی رونقیں ماند پڑگئی ہیں۔

قابض بھارتی انتظامیہ نے کشمیری مسلمانوں کو آج سری نگر کی تاریخی جامع مسجد اور عید گاہ میں بھی نماز عید ادا کرنے کی اجازت نہیں دی ہے۔
حکام نے جامع مسجد کے مرکزی دروازے کو قفل کردیا اور آزادی کے حق میں مظاہروں کو ناکام بنانے کے لیے نوہٹہ اور شہر کے دیگرعلاقوں میں بڑی تعداد میں بھارتی فوجی اور پیرا ملٹری اہلکار تعینات کر دیے ہیں۔