کینیڈا کے شہر وینکوور میں ایک حملہ آور نے فائرنگ کر کے دو افراد کو ہلاک کر دیا۔ فائرنگ سے زخمی ہونے والے دیگر دو افراد میں شامل ایک خاتون کی حالت نازک بتائی جاتی ہے جبکہ حملہ آور پولیس کی جوابی کارروائی میں مارا گیا۔

پولیس کے مطابق یہ واقعہ پیر کے روز وینکوور شہر کے نواحی علاقے لینگ لے میں صبح کے وقت پیش آیا۔ ابتدائی طور پر ملنے والی اطلاعات میں بتایا گیا تھا کہ حملہ آور نے ایک کیسینو، بے گھر افراد کے رہائشی کمپلیکس اور ایک بس اسٹاپ کو نشانہ بنایا جبکہ وہ رات 3 بجے سے صبح پونے 6 بجے کے دوران فائرنگ کرتا رہا تھا۔ اطلاع ملنے پر مقامی پولیس نے لوگوں کو ایس ایم ایس کے ذریعے خبردار کیا اور انہیں چوکنا رہنے کی تاکید کی۔

مقامی پولیس چیف کے مطابق پیٹرولنگ پولیس کو ہائی وے بائی پاس پر ایک زخمی شخص ملا جس کی مدد سے پولیس نے حملہ آور کا پیچھا کیا اور اسے موقع پر ہی گولی مار دی۔ حملہ آور کی فائرنگ سے چار افراد زخمی ہوئے تھے جبکہ حملہ آور ایک ہی شخص تھا جس کی شناخت 28 سالہ جارڈن ڈینیئل گوگن کے نام سے ہوئی ہے اور وہ برٹش کولمبیا صوبے کے علاقے سرے کا رہائشی ہے۔ قاتل کا نشانہ بننے والے دو افراد کی موت ہو چکی ہے۔

پولیس چیف نے اس بات کی تصدیق کی کہ حملہ آور نے ایک سے زائد مقامات پر لوگوں کو نشانہ بنایا۔ اگرچہ امریکا کے مقابلے میں کینیڈا میں فائرنگ کے ایسے واقعات زیادہ عام نہیں ہیں تاہم 2020ء میں ایک شخص نے پولیس کی وردی پہن کر 22 لوگوں کو گھروں میں گھس کر قتل کر دیا تھا اور گھروں کو آگ لگا دی تھی۔

کینیڈین وزیراعظم جسٹن ٹروڈو اس طرح کے فائرنگ کے واقعات میں اضافے کی وجہ سے تجویز دے چکے ہیں کہ ملک میں عوام کو اسلحے کی رسائی اور ہتھیاروں کی کھلے عام فروخت کو روکنے کے لیے قانون سازی کی جانی چاہیے۔