اسلام آباد: تہاڑ جیل میں قید حریت رہنما یاسین ملک کے ساتھ اظہارِ یکجہتی کے لیے لگایا گیا بھوک ہڑتالی کیمپ کا آج دوسرا روز ہے۔

جموں و کشمیر لبریشن فرنٹ کی جانب سے نیشنل پریس کلب کے سامنے بھوک ہڑتال کیمپ آج دوسرے روز بھی جاری ہے۔

نمائندہ یاسین ملک رفیق ڈار کہتے ہیں یاسین ملک نے غیر قانونی سزا کے خلاف تہاڑ جیل میں بھوک ہڑتال کا اعلان کیا ہے جس کا آغاز آج 22 جولائی سے کیا ہے۔

انہوں نے کہا کہ بھارت یاسین ملک کے خلاف سزا میں عالمی قوانین کی دھجیاں بکھیر رہا ہے، یاسین ملک کو فیئر ٹرائل کے حق سے بھی محروم کیا جارہا ہے۔

ان کا کہنا تھا کہ آزاد کشمیر پاکستان سمیت دنیا بھر میں بھوک ہڑتالی کیمپ لگائے گئے ہیں، عالمی برادری یاسین ملک کی یکطرفہ سزا کا نوٹس لے۔

دوسری جانب مائیکرو بلاگنگ سائٹ پر یاسین ملک کی اہلیہ مشال ملک کا کہنا تھا کہ یاسین نے آج سے غیر متعینہ مدت تک بھوک ہڑتال کا اعلان کیا ہے، ہمیں دعاؤں کی ضرورت ہے۔

واضح رہے کہ جموں و کشمیر لبریشن فرنٹ کے سربراہ یاسین ملک پر عائد کردہ بے بنیاد و من گھڑت الزامات پر بھارتی عدالت نے انہیں عمر قید کی سزا سنادی ہے۔

 مجموعی طور پر یاسین ملک کو دو مرتبہ عمر قید اور پانچ مرتبہ 10/10 سال قید کی سزائیں سنائی گئی ہیں جبکہ ان پر 10 ہزار روپے  کا جرمانہ بھی عائد کیا گیا ہے۔