ایران نے بیرونِ ممالک سے سرگرم مجاہدین خلق جیسے ایران مخالف گروہوں کی مدد کرنے کے الزام میں مزید 61 امریکیوں پر پابندیاں عائد کرنے کا اعلان کیا ہے۔

ایران نے جن امریکیوں کو بلیک لسٹ کیا ہے ان میں سابق وزیر خارجہ مائیک پومپیو، سابق صدر ڈونلڈ ٹرمپ کے نجی وکیل روڈی جولیانی اور سابق قومی سلامتی کے مشیر جون بولٹن شامل ہیں۔ یہ افراد مجاہدین خلق کے پروگراموں میں شامل اور اس کی حمایت میں آواز بلند کرتے رہے ہیں۔

یہ پہلا موقع نہیں ہے جب ایران نے امریکیوں پر پابندی عائد کی ہے۔ جنوری میں بھی اس نے 51 امریکیوں پر پابندیاں عائد کردی تھیں جبکہ اپریل میں دیگر 24 امریکیوں کو بلیک لسٹ کر دیا تھا۔ جون میں ایک ایرانی عدالت نے امریکی حکومت کو ان ایرانی جوہری سائنسدانوں کے اہل خانہ کو چار ارب ڈالر سے زائد معاوضہ ادا کرنے کا حکم دیا تھا جو حالیہ برسوں میں ٹارگٹ حملوں کے دوران مارے گئے ہیں۔

ترجمان امریکی وزارت خارجہ نے کہا ہے کہ امریکا اپنے شہریوں کی حفاظت اور دفاع کرے گا۔ اس میں وہ افراد بھی شامل ہیں جو اس وقت امریکا میں خدمات انجام دے رہے ہیں اور وہ بھی جو پہلے خدمات انجام دے چکے ہیں۔ ہم دھمکیوں اور اشتعال انگیزیوں کے خلاف متحد ہیں اور ہم اپنے اتحادیوں اور شرکاء کے ساتھ مل کر کام کریں گے اور ایران کی طرف سے کسی بھی حملے کا جواب دیں گے۔

واضح رہے کہ سابق صدر ڈونلڈ ٹرمپ نے 2015ء میں امریکا کو جوہری معاہدے سے یک طرفہ طورپر الگ کرلیا تھا اور ایران کے خلاف مزید پابندیاں عائد کردی تھیں تاہم صدر بائیڈن نے اس اقدام کو ایک بڑی غلطی قرار دے کر معاہدے کو دوبارہ بحال کرنے کی کوشش کی۔ یہ کوششیں تاحال کامیاب نہیں ہو سکی ہیں کیونکہ عالمی جوہری توانائی ایجنسی کی رپورٹس کے مطابق ایران نے اپنے جوہری پروگرام کو وسعت دینے کا سلسلہ جاری رکھا ہوا ہے۔