سری لنکا کے صدر راج پاکسے مالدیپ سے سنگاپور کے لیے روانہ ہوگئے ہیں۔

غیرملکی میڈیا کے مطابق گذشتہ روز اپنے ملک سے فرار ہوکر مالدیپ پہنچنے والے سری لنکا کے صدر راج پاکسے نجی طیارے میں سنگاپور روانہ ہوگئے ہیں۔

راج پاکسے دو باڈی گارڈ اور اہلیہ کے ہمراہ ایئرفورس کے جہاز میں ملک سے فرار ہوئے تھے۔

رپورٹ کے مطابق سری لنکن صدر کے قریبی ساتھی کا کہنا ہے کہ راج پکسے اس وقت مالدیپ کے دارالحکومت میل میں ہیں جہاں سے وہ کسی دوسرے ایشیائی ملک منتقل ہوجائیں گے۔

واضح رہے کہ اس سے قبل سری لنکن صدر نے عہدے سے استعفیٰ دینے کا اعلان کیا تھا تاہم پارلیمنٹ کے اسپیکر کو اب تک ان کا استعفیٰ موصول نہیں ہوا ہے۔

استعفیٰ دینے سے قبل ہزاروں کی تعداد میں مظاہرین نے صدارتی محل پر حملہ کردیا تھا جبکہ وزیر اعظم رانیل وکرماسنگھے کے گھر کو بھی نذر آتش کردیا گیا تھا۔

دوسری جانب سری لنکا میں حکومت مخالف مظاہرے جاری ہیں جبکہ پولیس اورمظاہرین کے درمیان جھڑپوں میں 2 افراد ہلاک اور 100 سے زائد زخمی ہوگئے۔

 حکومت نے مظاہرین سے نمٹنے کے لئے فوج طلب کرلی ہے اور سری لنکا میں غیرمعینہ مدت کے لیے ایمرجنسی نافذ ہے۔

خیال رہے کہ سری لنکا کئی مہینوں سے اپنی تاریخ کے بدترین معاشی بحران کی لپیٹ میں ہے۔ ملک کے 22 ملین عوام اس وقت اشیائے ضروریہ کی شدید قلت سے دوچار ہیں۔

سری لنکا پر اس وقت 51 ارب ڈالر کا غیر ملکی قرض ہے اور اس کے ساتھ ہی ملک میں پٹرول، ادویات اور خوراک تیزی سے ختم ہوتے جا رہے ہیں۔