خادم حرمین شریفین نے مہنگائی کےاثرات کم کرنے کے لیے20 ارب ریال کی منظوری دیدی۔

عرب میڈیا رپورٹ کے مطابق سعودی عرب میں شاہ سلمان بن عبدالعزیز نے ولی عہد شہزادہ محمد بن سلمان کی سفارش پر شہریوں پر بڑھتی ہوئی عالمی مہنگائی کے اثرات کو کم کرنے میں مدد کےلیے 20 ارب ریال مختص کرنے کی منظوری دی ہے۔

اقتصادی و ترقیاتی امور کونسل کے اجلاس کے بعد ولی عہد شہزادہ محمد بن سلمان نے معاشرے کے انتہائی ضرورت مند طبقوں کے مسائل سے نمٹنے کا عندیہ دیا تھا۔

شہزادہ محمد بن سلمان نے مہنگائی کے اس صورتحال سے نمٹنے کے لیے شاہ سلمان بن عبدالعزیز کو تجاویز دی تھیں۔

 انہوں نے اس کی منظوری دیتے ہوئے بیس ارب ریال کی اعانت مختص کرنے کا حکم دیا تاکہ مہنگائی کی عالمی لہر کے مسائل سے نمٹا جاسکے۔

رقم کا نصف حصہ سوشل انشورنس اور سیٹزن  اکاؤنٹ پروگرام میں جائے گا، آٹھ ارب ریال سیٹزن اکاؤنٹ پروگرام  کےصارفین میں تقسیم کیے جائیں گے۔

منظوری نکات کے تحت دو ارب ریال 2022 مالی سال کے دوران سماجی کفالت کے مستحقین میں تقسیم کیے جائیں گے، یاد رہے کہ یہ زراعانت صرف ایک بار دیا جائے گا۔

شاہی منظوری کے نکات میں کہا گیا کہ 8 ارب ریال رواں مالی سال کے آخر تک سٹیزن اکاؤنٹ پروگرام کے صارفین کو اضافی مالی مدد کے طور پر تقسیم کیے جائیں گے۔

آخری نکتہ یہ ہے کہ مویشیوں کی دیکھ بھال کرنے والے چھوٹے سرمایہ کاروں میں 408 ملین ریال بطور اعانت تقسیم کیے جائیں گے۔