امریکا نے اپنے شہریوں کو ایمن الظواہری کی ہلاکت کے بعد ممکنہ خطرے سے محتاط رہنے کی ہدایت کردی ہے۔

میڈیا رپورٹس کے مطابق امریکی محکمہ خارجہ نے یہ خدشہ ظاہر کیا ہےکہ ایمن الظواہری کی ہلاکت کے بعد امریکی املاک اور اس کے شہریوں پر حملے ہوسکتے ہیں۔

محکمہ خارجہ نے جاری کردہ بیان میں کہا کہ ایمن الظواہری کی ہلاکت کے بعد امریکی مخالفین کے جذبات بڑھ سکتے ہیں جس کے وجہ سے دنیا بھر میں موجود امریکی شہری محتاط رہیں۔

یہ بھی پڑھیں: افغانستان، القاعدہ کے رہنما ایمن الظواہری امریکی ڈرون حملے میں جاں بحق

امریکی محکمہ خارجہ کے حالیہ اطلاعات یہ ظاہر کرتی ہیں کہ دہشتگرد تنطیمیں خطے سمیت دنیا بھر میں امریکی مفادات پر حملوں کی مسلسل منصوبہ بندی کررہی ہیں۔

امریکی محکمہ خارجہ کا مزید کہنا تھا کہ اس طرح کے حملوں میں خودکش دھماکے، قتل، بم دھماکے ہائی جیکنگ اور اغوا کی صورت میں ہوسکتے ہیں، اس لیے امریکی شہری غیر ملکی سفر کے دوران انتہائی محتاط رویہ اختیار کرتے ہوئے صورتحال سے مکمل باخبر رہیں۔

یہ بھی پڑھیں: القاعدہ کے سربراہ ایمن الظواہری کی زندگی پر ایک نظر

واضح رہے کہ القاعدہ کے سربراہ ایمن الظواہری کو افغان دارالحکومت کابل میں ایک امریکی ڈرون حملے میں ہلاک کر دیا گیا۔

 ایک اندازے کے مطابق امریکی سی آئی اے کی یہ کارروائی 31 جولائی 2022ء بروز اتوار کو عمل میں لائی گئی تھی۔