جمعرات کو بھارت کے وزیر دفاع راجناتھ سنگھ نے ٹوکیو میں اپنے ہم منصب سے ملاقات کے بعد مشترکہ فوجی مشقیں کرنے کا اعلان کیا ہے۔

غیر ملکی خبر رساں ادارے کے مطابق جمعرات کو بھارت کے وزیر دفاع راجناتھ سنگھ نے ٹوکیو میں اپنے ہم منصب یاسوکازو حمادا سے ملاقات کی ہے۔

اس موقع پر بھارت کے وزیر دفاع نے دفاعی شعبے میں جاپانی صنعت کاروں کو سرمایہ کاری کی دعوت دی ہے۔

بھارت کے وزیر دفاع کی جانب سے جاری بیان کے مطابق ملاقات میں دونوں وزراء نے اس بات پر اتفاق کیا ہے کہ ابتدائی لڑاکا مشقوں کا جلد انعقاد کیا جائے گا جو دونوں ملکوں کی فضائی افواج کے درمیان مزید تعاون اور باہمی تعاون کی راہ ہموار کرے گا۔

واضح رہے کہ بھارت بھی جاپان کی طرح اپنے پڑوسی ممالک سے نمٹنے کے لیے اپنی فوجی قوت کو بڑھا رہا ہے۔

حال ہی میں کواڈ اجلاس کے بعد بھارت کے وزیر اعظم نریندر مودی نے جاپانی وزیر اعظم کشیڈا سے ملاقات کی تھی جس میں دونوں فریقوں کے درمیان اس بات پر اتفاق کیا گیا تھا کہ دونوں ملک انڈو پیسفک کو کھلا اور آزاد رکھنے کے لیے مل کر کام کریں گے۔

واضح رہے کہ بھارت اور جاپان، آسٹریلیا اور امریکہ کے ساتھ مل کر کواڈ گروپ آف نیشنز کے رکن ہیں جو انڈوپیسفک کے پار سالانہ بحری مشقوں کا انعقاد کرتے ہیں۔

یاد رہے کہ بھارت نے گذشتہ ہفتے اپنا پہلا مقامی ساختہ طیارہ بردار بحری جہاز بناکر پانی میں اتارا ہے۔