روس کے شہر ولاڈی واسٹوک میں جاپانی قونصل جنرل کو جاسوسی کے الزام میں حراست میں لے لیا گیا ہے۔

 غیر ملکی خبر رساں ادارے کے مطابق روسی سیکیورٹی فورسز نے دعویٰ کیا ہے کہ جاپانی سفارت کار کو جاسوسی کرتے ہوئے رنگے ہاتھوں پکڑا ہے جب کہ وہ روس پرعائد پابندیوں کی خفیہ معلومات حاصل کر رہے تھے۔

روسی سیکیورٹی فورسز کا کہنا تھا کہ سفارت کار مشرقی پریمورسکی کے علاقے پر ’مغربی پابندیوں کے اثرات‘ کے بارے میں بھی معلومات حاصل کر رہا تھا۔

انہوں نے کہا کہ سفارتی تعلقات کے ذریعے ٹوکیو کو اپنا احتجاج ریکارڈ کروایا ہے جب کہ روسی سیکیورٹی فورسز نے ایک مختصر ویڈیو بھی شیئر کی ہے جس میں سفارت کار کی جانب سے یہ تسلیم کیا گیا ہے کہ انہوں نے روسی قوانین کی خلاف ورزی کی ہے۔

روس کی وزارت خارجہ کا ایک بیان میں کہنا ہے کہ جاپانی سفارت کار کو 48 گھنٹوں کے اندر ملک چھوڑنے کا حکم دیا گیا ہے۔

تاہم جاپانی حکومت نے روس میں قونصل جنرل کو حراست میں لینے پر شدید احتجاج کیا ہے۔

واضح رہے کہ روس جاپان کو ایک دشمن ملک سمجھتا ہے، روس کے یوکرین پر حملے کے بعد سے دونوں ملکوں کے درمیان سفارت کاروں کی بے دخلی کا عمل جاری ہے اور دونوں ممالک نے ایک دوسرے پر پابندیاں عائد کررکھی ہیں۔

یوکرین پر روس کے حملے سے قبل بھی ٹوکیو کے ماسکو کے ساتھ پیچیدہ تعلقات تھے اور دونوں فریقین نے ابھی تک دوسری جنگ عظیم کے بعد سے امن معاہدے پر دستخط نہیں کیے ہیں۔