لندن: ملکہ الزبتھ کو خراج عقیدت پیش کرنے اور ان کے آخری دیدار کے لیے ہزار افراد پہنچ گئے ہیں۔

غیر ملکی میڈیا کے مطابق ملکہ الزبتھ دوم کی وفات کے بعد ان کی آخری رسومات ادا کی جا رہی ہے تاہم ملکہ کا تابوت لندن میں ویسٹ منسٹر ہال میں عام دیدار کے لیے رکھا ہوا ہے۔ 19 ستمبر تک عوام ملکہ کوخراج عقیدت پیش کریں گے۔

ملکہ الزبتھ دوم کی تدفین 19 ستمبرکوسینٹ جارج چیپل میں ہوگی۔ اس سے قبل ان کی آخری رسومات ویسٹ منسٹر ایبے میں ادا کی جائیں گی۔

آخری رسومات میں شرکت کے لیے 500 سربراہان مملکت اور دیگر غیر ملکی مہمان مدعو ہیں جن میں امریکی صدر، جاپان کے بادشاہ ، ترکیہ اور فرانس کے صدور بھی شامل ہیں۔

علاوہ ازیں بیلجیئم، نیدر لینڈ، اسپین، ناروے، سوئیڈن، ڈنمارک اور مناکو کے شاہی خاندانوں نے بھی آخری رسومات میں شرکت کی دعوت قبول کرلی ہے جب کہ آسٹریلیا، نیوزی لینڈ اورکینیڈین وزرائے اعظم بھی تقریبات میں شرکت کریں گے۔

رپورٹس کے مطابق لندن میں سیکیورٹی ہائی الرٹ ہے، پولیس اور فوج نے سیکیورٹی کی ذمہ داریاں سنبھال رکھی ہیں۔ 19 ستمبرکو برطانیہ میں بینکوں کی عام تعطیل بھی ہوگی۔

واضح رہے کہ 8 ستمبر 2022 کو ملکہ الزبتھ دوم 96 برس کی عمر میں انتقال کرگئیں تھیں جب کہ وہ برطانیہ کی سب سے طویل عرصے تک حکمرانی کرنے والی ملکہ تھیں۔

انہوں نے 70 سال تک برطانیہ پر حکمرانی کی ہے جب کہ ان کی وفات کے بعد بڑے بیٹے چارلس برطانیہ کے نئے بادشاہ بن گئے ہیں۔