روس نے یوکرین کے مختلف شہروں پر ایرانی ساختہ خوش کش ڈرون برسادیے ہیں جس کے نتیجے میں 8 افراد ہلاک اور متعدد زخمی ہوگئے ہیں۔

غیر ملکی خبر رساں ادارے کے مطابق روس نے یوکرین کے دارالحکومت کیف سمیت تین شہروں پر خودکش ڈرون برسائے ہیں جن میں دنیپرو اور سمی شہر بھی شامل ہیں۔

دارالحکومت کیف پر کیے گئے حملوں میں 2 افراد جان کی بازی ہار بیٹھے جب کہ دنیپرو میں 2 اور سمی شہر میں 4 افراد کی ہلاکت رپورٹ ہوئی ہے۔

رپورٹ کے مطابق سمی شہر پر کیے گئے ڈرون حملوں میں توانانی پیدا کرنے والی ایک تنصیب کو بھی نشانہ بنایا گیا ہے جس کے باعث 100 سے زائد دیہات تاریکی میں ڈوب گئے ہیں۔

علاوہ ازیں ان حملوں میں درجنوں افراد کے زخمی ہونے کی اطلاعات ہیں جب کہ ان شہروں میں بڑے پیمانے پر عمارتوں کو بھی نقصان پہنچا ہے۔

واضح رہے کہ روس نے یوکرین پر حملوں میں جن ڈرونز کو استعمال کیا انہیں کامیکاز ڈرون کہا جاتا ہے جو اپنے اندر بارودی مواد رکھنے کی صلاحیت رکھتے ہیں۔

کامیکاز ڈرون خوش کش بمبار کی طرح استعمال ہوتے ہیں جو اپنے ہدف پر پہنچ کر ہی خود کو تباہ کرتے ہیں جس کی وجہ سے انہیں خود کش بمبار بھی کہا جاتا ہے۔

کامیکاز ڈرون کی اصطلاح سب سے پہلے دوسری جنگ عظٰیم میں استعمال ہوئی تھی جب جاپان کے خودکش پائلٹس اپنی جانوں کی پرواہ نہ کرتے ہوئے طیارے کو ہدف سے ٹکرادیا کرتے تھے۔

کامیکار ڈرونز ایرانی ساختہ ڈرونز ہیں جس پر امریکہ نے بھی شدید تنقید کا نشانہ بناتے ہوئے ایران پر نئی پابندیاں عائد کرنے کا عندیہ دیا ہے۔

یاد رہے کہ امریکہ سمیت عالمی طاقتیں کئی مرتبہ ایران پر روس کو ڈرونز کی فراہمی کرنے کا الزام عائد کرتی ہیں تاہم ایران ہمیشہ ان الزامات کو مسترد کرتا رہا ہے۔