سعودی عرب کی حکومت نے صرف ویزے پر بنا کسی فیس کے ملک میں چار دن تک قیام کی سہولت متعارف کرا دی۔

تفصیلات کے مطابق مملکت نے ٹرانزٹ ویزے پر سعودی عرب آنے والے افراد سے فیس نہ لینے کا فیصلہ کیا ہے۔

سعودی خبر رساں ادارے نے اپنی ایک رپورٹ میں کہا کہ شاہ سلمان بن عبدالعزیز نے ریاض کے قصر یمامہ میں کابینہ کے اجلاس کی صدارت کرتے ہوئے اہم فیصلے کئے ہیں۔

اس اجلاس میں فیصلہ کیا گیا کہ سعودی عرب آنے والے افراد سے ٹرانزٹ ویزے پر کسی بھی قسم کی فیس نہیں لی جائے گی۔

شاہ سلمان بن عبدالعزیز کی زیر صدارت اجلاس میں ٹرانزٹ ویزوں کی میعاد میں اضافہ کرتے ہوئے اسے تین ماہ کر دیا گیا ہے جکہ اسی ویزے پر مسافر بنا کوئی فیس دیئے 4 دن یعنی 96 گھنٹے تک مملکت میں قیام کر سکتا ہے۔

خبر رساں ادارے کی خبر کے مطابق اجلاس میں ہر قسم کے سنگل انٹری وزٹ ویزوں پر آنے والے افراد کو سعودی عرب میں 3 ماہ تک قیام کی اجازت بھی دی گئی ہے، جبکہ سنگل انٹری ویزہ 30 دن اور ملٹی پل انٹری ویزہ 90 دن کے لیے موثر ہو گا۔

سعودی جنرل ڈائریکٹوریٹ آف پاسپورٹ کے ترجمان کے مطابق اگر مسافر کے پاس میڈیکل انشورنس پالیسی ہے تو اس کے ختم ہونے والے وزٹ ویزے کی میعاد کو سات دن پہلے بڑھایا بھی جاسکتا ہے۔

سعودی پاسپورٹ آفس کے مطابق ختم ہونے والے وزٹ ویزہ کی میعاد میں تین دن گزرنے کے بعد توسیع نہ کرانے پر جرمانہ وصول کیا جائے گا۔

ترجمان کا مزید کہنا تھا کہ وزٹ ویزہ کی مجموعی توسیع 180 دن سے زیادہ نہیں ہو گی اور وزٹ ویزہ کسی صورت میں بھی رہائشی ویزے میں تبدیل نہیں ہو گا۔